ജിഎൻപിസിയുടെ ഡിജെ പാർട്ടിയും; കൂടുതൽ കേസുകള്‍

തിരുവനന്തപുരം: മദ്യപാനത്തെ പ്രോത്സാഹിപ്പിക്കുന്നതായി എക്സൈസ് ആരോപിക്കുന്ന
ജിഎൻപിസി (ഗ്ലാസിലെ നുരയും പ്ലേറ്റിലെ കറിയും) എന്ന ഫേസ്ബുക്ക് ഗ്രൂപ്പിനെതിരെ കൂടുതൽ കേസുകള്‍. എക്സൈസിന് പിന്നാലെ പൊലീസും ഇവർക്കെതിരെ കേസെടുക്കും. തിരുവനന്തപുരം സിറ്റി പൊലീസ് കമ്മീഷണറുടെതാണ് ഉത്തരവ്. നാര്‍കോട്ടിക് സെല്‍ കമ്മീഷണറുടെ റിപ്പോര്‍ട്ടിന്മേലാണ് നടപടി ഉണ്ടായിരിക്കുന്നത്.

ജിഎന്‍പിസി ഫേസ്ബുക്ക് ഗ്രൂപ്പിനെതിരെ എക്സൈസ് കേസെടുത്തു. ഫെയ്സ് ബുക്ക് ഗ്രൂപ്പിൻറെ മറവിൽ അഡ്മിൻ അജിത് കുമാർ നടത്തിയ ഡിജെ പാർട്ടിയിൽ 98 പേർ പങ്കെടുത്തതായി എക്സൈസ് കണ്ടെത്തിയതിനെ തുടര്‍ന്നായിരുന്നു നടപടി. പാർ‍ട്ടി നടന്ന പാപ്പനംകോട്ടുള്ള ഹോട്ടലിൽ എക്സൈസ് പരിശോധന നടത്തുകയും മാനേജറുടെ ജീവനക്കാരുടെയും മൊഴിയെടുക്കുകയും ചെയ്തു. തിരുവനന്തപുരത്ത് നടന്ന ഡിജെ പാര്‍ട്ടിയിൽ പ്രധാന മദ്യകമ്പനിയായിരുന്നു സ്പോൺസർ. കൂടാതെ വിദേശത്തും സൗജന്യമായി മദ്യം വിളമ്പി പാര്‍ട്ടി നടത്തിയെന്നും എക്സൈസ് വ്യക്തമാക്കി.

പാ‍ർട്ടിക്കെത്തുന്നവർക്ക് മദ്യം സൗജന്യമായി നൽകുമെന്ന് പരസ്യം നൽകിയതിന് അജിതിനെതിരെ പുതിയ വകുപ്പ് ചുമത്തും. കൂടാതെ ഗ്രൂപ്പിൽ മദ്യപാനത്തെ പ്രോത്സാഹിപ്പിക്കാൻ കുട്ടികളെ ഉപയോഗിച്ചതിനെതിരേയും മതസ്പർദ വളർത്താനുതകുന്ന പോസ്റ്റുകളിട്ടതിനെതിരേയും കേസുകളെടുക്കും.