ഗോവ മുഖ്യമന്ത്രി മനോഹര്‍ പരീക്കര്‍ ആശുപത്രിയില്‍

പനാജി: ഗോവ മുഖ്യമന്ത്രി മനോഹര്‍ പരീക്കറെ ഗോവയിലെ സ്വകാര്യ ആശുപത്രിയില്‍ പ്രവേശിപ്പിച്ചു. കടുത്ത പനിയെത്തുടര്‍ന്ന് വ്യാഴാഴ്ചയാണ് ഇദ്ദേഹത്തെ ആശുപത്രിയില്‍ പ്രവേശിപ്പിച്ചത്. നിയമസഭാ ഡെപ്യൂട്ടി സ്പീക്കര്‍ മൈക്കേല്‍ ലോബോയാണ് ഇക്കാരം മാധ്യമങ്ങളെ അറിയിച്ചത്. അതേസമയം മനോഹര്‍ പരീക്കറുടെ ആരോഗ്യനില സംബന്ധിച്ച കൂടുതല്‍ വിവരങ്ങള്‍ അധികൃതര്‍ പുറത്തുവിട്ടിട്ടില്ല.

പാന്‍ക്രിയാസിലെ അര്‍ബുദത്തിന് അമേരിക്കയില്‍ ചികിത്സയിലായിരുന്നു മനോഹര്‍ പരീക്കര്‍. സെപ്തംബര്‍ ആറിന് അമേരിക്കയില്‍ നിന്നും മടങ്ങിയെത്തിയ പരീക്കര്‍ പനാജിയിലെ വസതിയില്‍ വിശ്രമത്തിലായിരുന്നു. ഇതിനിടെയാണ് പനി ബാധിച്ചത്. കഴിഞ്ഞ ആഴ്ചയും അദ്ദേഹത്തെ കാന്‍ഡോളിം ബീച്ച് വില്ലേജിലെ ആശുപത്രിയില്‍ ചികിത്സ തേടിരുന്നു. കഴിഞ്ഞ ആറു മാസത്തിനിടെ മൂന്ന് തവണയാണ് മനോഹര്‍ പരീക്കര്‍ പരീക്കര്‍ വിദഗ്ധ ചികിത്സയ്ക്കായി അകേരിക്കയില്‍ പോയത്.