പുനരധിവാസം: നെതര്‍ലന്‍ഡ്‍സ് സഹായം വേണമെന്ന് കേരളം

ന്യൂഡൽഹി: പ്രളയത്തിന് ശേഷം കേരളത്തിന്റെ പുനർ നിർമാണം എങ്ങനെ വേണമെന്ന സാധ്യത പഠനത്തിന് നെതർലൻഡ്‌സ് സഹായം ആവശ്യമെന്ന് സർക്കാർ. സാധ്യതാപഠനത്തിന് നെതർലൻഡ്‌സ് സഹായം തേടണമെന്ന് കേരളം കേന്ദ്രസർക്കാരിനോട് ആവശ്യപ്പെട്ടു. ചീഫ് സെക്രട്ടറി ടോം ജോസാണ് ഇത് സംബന്ധിച്ച കത്ത് കേന്ദ്രത്തിന് കൈമാറിയത്. കത്ത് പരിഗണിച്ച വിദേശ മന്ത്രാലയം മറ്റ് മന്ത്രാലയങ്ങളുടെ അഭിപ്രായം തേടി.

നെതർലൻഡ്‌സ് സഹായവാഗ്‌ദാനം അംബാസിഡറും മലയാളിയുമായ വേണു രാജാമണിയാണ് അറിയിച്ചത്. പുനരധിവാസ പ്രവർത്തനങ്ങളുടെ പഠനത്തിന് സാങ്കേതിക വിദ്യയും വിദഗ്‌ധരുടെ സംഘവുമാണ് നെതർലൻഡ്‌സ് വാഗ്‌ദാനം ചെയ്തത്. ഇത് സംബന്ധിച്ച് കേന്ദ്ര -സംസ്ഥാന സർക്കാരുകൾക്ക് നെതർലൻഡ്‌സ് കത്തയച്ചിരുന്നു. വിദേശ സഹായം സ്വീകരിക്കില്ലെന്ന് കേന്ദ്രം നേരത്തെ നയം വ്യക്തമാക്കിയിരുന്നു. ചുരുങ്ങിയ ദിവസങ്ങൾക്കുള്ളിൽ കേന്ദ്രം വിഷയത്തിൽ മറുപടി നൽകുമെന്ന പ്രതീക്ഷയിലാണ് കേരളം.