ജൂനിയര്‍ ഡോക്ടര്‍മാര്‍ക്ക് ശക്തമായ താക്കീതുമായി സര്‍ക്കാര്‍

തിരുവനന്തപുരം: ജൂനിയര്‍ ഡോക്ടര്‍മാര്‍ നടത്തുന്ന സമരം നിര്‍ത്തിയില്ലെങ്കിൽ കനത്ത പ്രത്യാഘാതം നേരിടേണ്ടി വരുമെന്ന് ആരോഗ്യമന്ത്രി കെ കെ ശൈലജ. സാഹചര്യത്തിന്‍റെ ഗൗരവം മനസ്സിലാക്കി ജോലിയിൽ പ്രവേശിക്കാൻ ഡോക്ടര്‍മാര്‍ തയ്യാറാകണമെന്നും മന്ത്രി ആവശ്യപ്പെട്ടു. ഡോക്ടര്‍മാര്‍ മുന്നോട്ടുവെച്ച ആവശ്യങ്ങളെല്ലാം സര്‍ക്കാര്‍ അംഗീകരിച്ചതാണെന്നും എന്നാൽ തിരിച്ച് ലഭിക്കുന്ന പ്രതികരണം അനുകൂലമല്ലെന്നും മന്ത്രി പറഞ്ഞു.

അതേസമയം സമരം തുടര്‍ന്നാൽ എന്ത് നടപടി സ്വീകരിക്കുമെന്ന് പിന്നീട് തീരുമാനിക്കുമെന്ന് മന്ത്രി പറഞ്ഞു. ഇന്ന് ജൂനിയര്‍ ഡോക്ടര്‍മാരുടെ പ്രതിനിധികളുമായി ചര്‍ച്ച നടക്കാനിരിക്കേയാണ് വീണ്ടും സമരം.

ഇന്നലെ മന്ത്രിയുമായി നടത്തിയ ചര്‍ച്ചയിൽ സമരം ഒത്തുതീര്‍പ്പായെന്നായിരുന്നു സമരസമിതി ഭാരവാഹികള്‍ ഇന്നലെ അറിയിച്ചത്. എന്നാൽ ഭാരവാഹികളെ ചുമതലയിൽ നിന്ന് നീക്കിയ ശേഷമാണ് ഒരു വിഭാഗം വിദ്യാര്‍ത്ഥികള്‍ ചര്‍ച്ചയിൽ പുതിയ ഉറപ്പുകളൊന്നും ലഭിച്ചില്ലെന്ന് ആരോപിച്ച് ഒരു വിഭാഗം സമരം ആരംഭിച്ചത്.

പെന്‍ഷന്‍ പ്രായം വര്‍ധിപ്പിച്ചത് പിന്‍വലിക്കുക, കൂടുതല്‍ തസ്തികകള്‍ സൃഷ്ടിക്കുക, ബോണ്ട് കാലാവധി കുറയ്ക്കുക, പ്രൊമോഷന്‍ ത്വരിതപ്പെടുത്തുക എന്നീ ആവശ്യങ്ങളാണ് വിദ്യാര്‍ഥികള്‍ ഉന്നയിച്ചത്.