നവകേരളത്തിനായുള്ള മുന്നൊരുക്കങ്ങള്‍ നടപ്പാക്കുമെന്ന് മുഖ്യമന്ത്രി

തിരുവനന്തപുരം: നവകേരളത്തിനായി സര്‍ക്കാര്‍ വിപുലമായ ഒരുക്കങ്ങള്‍ നടപ്പാക്കുമെന്ന് മുഖ്യമന്ത്രി പിണറായി വിജയന്‍. ഇതിന്‍റെ മുന്നോടിയായി ചീഫ് സെക്രട്ടറിയുടെ അധ്യക്ഷതയില്‍ മൂന്നംഗ സമിതിയെ നിയോഗിച്ചതായി മുഖ്യമന്ത്രി അറിയിച്ചു.

മുഖ്യമന്ത്രി ചെയര്‍മാനായും പ്രതിപക്ഷ നേതാവ് രമേശ് ചെന്നിത്തല, കേന്ദ്ര മന്ത്രി അല്‍ഫോണ്‍സ് കണ്ണന്താനം എന്നിവര്‍ അംഗങ്ങളായുള്ള ഉപദേശക സമിതിയും ഇതിനോടൊപ്പം രൂപികരിച്ചിട്ടുണ്ട്.

ദുരന്തമുഖത്ത് പ്രകടിപ്പിച്ച ഐക്യം പുനര്‍നിര്‍മ്മാണ പ്രവര്‍ത്തനങ്ങളുടെ ഘട്ടത്തിലും ഉണ്ടാകണമെന്നും യോജിപ്പിന്‍റെ അന്തരീക്ഷം എല്ലാ തലങ്ങളിലും സൃഷ്ടിക്കാനാണ് സര്‍ക്കാര്‍ ശ്രമിക്കുന്നതെന്നും മുഖ്യമന്ത്രി വ്യക്തമാക്കി.

നവകേരളത്തിനായി കക്ഷിരാഷ്ട്രീയത്തിനതീതമായി യോജിപ്പ് കൊണ്ടുവരാനാണ് സര്‍ക്കാര്‍ ശ്രമിക്കുന്നത്. കെപിഎംജിയുടെ സഹായം പുനര്‍നിര്‍മ്മാണ പദ്ധതികളുമായി ബന്ധപ്പെട്ട് എങ്ങനെവേണമെന്ന് ആലോച്ചിക്കുമെന്ന് മുഖ്യമന്ത്രി പറഞ്ഞു.

വിദേശ മലയാളികളില്‍ നിന്ന് ഫണ്ട് ശേഖരണം നടത്തുന്നതിനായുള്ള മന്ത്രിമാരുടെ യാത്രാനുമതി ഉടന്‍ ലഭിക്കുമെന്നാണ് പ്രതീക്ഷയെന്നും അദ്ദേഹം കൂട്ടിച്ചേര്‍ത്തു.