കെഎസ്ആർടിസിക്ക് സർക്കാർ 60 കോടി നൽകും

തിരുവനന്തപുരം: കെഎസ്എസ്ആർടിസി എംഡി നൽകിയ കത്തിന്‍റെ അടിസ്ഥാനത്തിൽ വിരമിച്ച ജീവനക്കാർക്ക് പെൻഷൻ നൽകാനുള്ള പണം നൽകാൻ സർക്കാർ തീരുമാനിച്ചു. അഞ്ചിലധികം മാസങ്ങളായി കെഎസ്ആർടിസി മുൻ ജീവനക്കാർക്ക് പെൻഷൻ നൽകുന്നില്ല. ഒരു മാസത്തെ പെൻഷൻ തുകയായ 60 കോടി രൂപയാണ് എംഡി ആവശ്യപ്പെട്ടത്. പെൻഷൻ ലഭിക്കാത്തത് മൂലം ജീവിതം വഴിമുട്ടിയ ഒരാൾ കഴിഞ്ഞ ദിവസം ജീവനൊടുക്കിയിരുന്നു. 224 കോടി രൂപയാണ് കെഎസ്ആർടിസിക്ക് പെൻഷൻ കുടിശിക തീർക്കാൻ വേണ്ടത്.

ധനമന്ത്രി തോമസ് ഐസക് കെഎസ്ആർടിസിയെ സർക്കാർ കൈവിടില്ലെന്ന് കഴിഞ്ഞ ദിവസം പ്രഖ്യാപിച്ചിരുന്നു. മുൻ ധാരണ അനുസരിച്ച് പെന്‍ഷന്‍റെ പകുതി തുക കെഎസ്ആർടിസിക്ക് സർക്കാർ നൽകും. പെൻഷൻ ഏറ്റെടുക്കണമെന്ന ആവശ്യം സർക്കാർ അംഗീകരിച്ചിട്ടില്ല. സംസ്ഥാന സർക്കാരിന് പുതിയ ബാധ്യതകൾ ഏറ്റെടുക്കാനാവില്ലെന്ന് ധനമന്ത്രി കഴിഞ്ഞ മാസം പ്രഖ്യാപിച്ചിരുന്നു. ശമ്പളവും പെൻഷനും സർക്കാർ നൽകിയാൽ തീരുന്നതല്ല കെഎസ്ആർടിസിയുടെ പ്രശ്‌നമെന്നും അദ്ദേഹം പറഞ്ഞിരുന്നു.