ശബരിമലയിലെത്തുന്നവര്‍ക്ക് സംരക്ഷണം ഒരുക്കുമെന്ന് മന്ത്രി ജയരാജന്‍

തിരുവനന്തപുരം: ശബരിമലയില്‍ തീര്‍ത്ഥാടനത്തിനെത്തുന്ന മുഴുവന്‍ വിശ്വാസികള്‍ക്കും സര്‍ക്കാര്‍ സംരക്ഷണം ഒരുക്കുമെന്ന് വ്യവസായ മന്ത്രി ഇ.പി ജയരാജന്‍. ശബരിമല വിഷയത്തില്‍ സംഘര്‍ഷം സൃഷ്ടിക്കാനാണ് സംഘപരിവാറും കോണ്‍ഗ്രസും ശ്രമിക്കുന്നത്. നിലവാരം കുറഞ്ഞ പ്രചരണമാണ് ഇക്കൂട്ടര്‍ നടത്തുന്നതെന്നും മന്ത്രി കുറ്റപ്പെടുത്തി. തന്‍റെ ഫേസ്ബുക്ക് പോസ്റ്റിലായിരുന്നു മന്ത്രിയുടെ പ്രതികരണം.

ശബരിമലയില്‍ എത്തുന്ന എല്ലാവര്‍ക്കും സുരക്ഷ ഉറപ്പുവരുത്താന്‍ സര്‍ക്കാര്‍ ബാധ്യസ്ഥരാണ്. വിശ്വാസികള്‍ക്ക് സര്‍ക്കാര്‍ പൂര്‍ണ സംരക്ഷണം ഒരുക്കുക തന്നെ ചെയ്യും. വിശ്വാസികളുമായി ഏറ്റുമുട്ടല്‍ എന്നത് സര്‍ക്കാര്‍ നിലപാടല്ല. വിശ്വാസവും വിശ്വാസികളുടെ ആരാധനാ സ്വാതന്ത്ര്യം നിറവേറ്റുക എന്നതുമാണ് എല്‍ഡിഎഫ് സര്‍ക്കാരിന്‍റെ നയമെന്നും ഇപി ജയരാജന്‍ വ്യക്തമാക്കി.