കെഎസ്ആര്‍ടിസി പെൻഷന് സര്‍ക്കാര്‍ പണം നല്‍കും

തിരുവനന്തപുരം: കെഎസ്ആര്‍ടിസി പെൻഷന് സര്‍ക്കാര്‍ പണം അനുവദിക്കാൻ തീരുമാനമായി. 60 കോടി രൂപ അനുവദിക്കാൻ ആവശ്യപ്പെട്ട് എംഡി നല്‍കിയ കത്തിന്‍റെ അടിസ്ഥാനത്തിലാണ് നടപടി. അഞ്ചു മാസത്തിലധികമായി പെൻഷൻ ലഭിക്കാത്തതുമൂലം ദുരിത്തിലാണ് പെൻഷൻകാര്‍. കുടിശിക തീര്‍ക്കാനായി 224 കോടി രൂപയാണ് കെഎസ്ആര്‍ടിസിയ്ക്ക് വേണ്ടത്.

പെൻഷന്‍റെ പകുതി നല്‍കാമെന്നാണ് നിലവിൽ സര്‍ക്കാര്‍ കെഎസ്ആര്‍ടിസിയുമായി ധാരണയായിരിക്കുന്നത്. ധാരണ പ്രകാരം സര്‍ക്കാര്‍ ഒരു വര്‍ഷം 360 കോടി രൂപയാണ് കെഎസ്ആര്‍ടിസിയ്ക്ക് നല്‍കേണ്ടത്. കഴിഞ്ഞ പത്തുമാസത്തിനിടെ 630 കോടി രൂപ സര്‍ക്കാര‍് നല്‍കിയിട്ടുണ്ട്. ഇതിനു പുറമെ സര്‍ക്കാര്‍ ജാമ്യത്തിൽ 505 കോടി രൂപ വായ്പയെടുത്തും നല്‍കിയിട്ടുണ്ട്. അതേസമയം പെൻഷൻ ഏറ്റെടുത്താൽ തീരുന്നതല്ല കെഎസ്ആര്‍ടിസിയുടെ പ്രതിസന്ധിയെന്നാണ് ധനമന്ത്രി തോമസ് ഐസക്കിന്‍റെ നിലപാട്.