നയപ്രഖ്യാപനത്തിനിടെ കേന്ദ്ര വിമർശനം ഒഴിവാക്കി ഗവർണർ

തിരുവനന്തപുരം: സംസ്ഥാന ബജറ്റ് സമ്മേളനത്തിലെ നയപ്രഖ്യാപനത്തിനിടെ കേന്ദ്രസർക്കാരിനെതിരായ വിമർശനം വായിക്കാതെ ഗവർണർ. ഫെഡറൽ ഭരണത്തെ അട്ടിമറിച്ച് കേന്ദ്രം ഇടപെടുന്നുവെന്ന പരാമർശമാണ് ഗവർണർ വായിക്കാതിരുന്നത്. ഇന്ന് രാവിലെയാണ് ഗവർണറുടെ നയപ്രഖ്യാപനത്തോടെ നിയമസഭയിൽ ബജറ്റ് സമ്മേളനം ആരംഭിച്ചത്.

ചില സംഘടനകൾ സംസ്ഥാനത്ത് വർഗീയ സംഘർഷത്തിന് ശ്രമിച്ചുവെന്നും കേന്ദ്ര ഇടപെടൽ സംസ്ഥാന ഭരണത്തെ അസ്വസ്ഥതപ്പെടുത്തുന്നു എന്ന പരാമർശവും നയപ്രഖ്യാപനത്തിനിടെ ഗവർണർ ഒഴിവാക്കി. ഗവർണർ പി.സദാശിവം ഒഴിവാക്കിയ വരികൾ മാധ്യമങ്ങൾക്കും നിയമസഭാംഗങ്ങൾക്കും ലഭിച്ച പകർപ്പിൽ നൽകിയിട്ടുണ്ട്. എന്നാൽ ചില ഭാഗങ്ങൾ ഒഴിവാക്കിയതായി ശ്രദ്ധയിൽ പെട്ടില്ലെന്ന് മുഖ്യമന്ത്രി പിണറായി വിജയൻ പറഞ്ഞു.