ഹിന്ദു മഹാസഭയുടെ വെബ്‌സൈറ്റിൽ 'ബീഫ് പാചകക്കുറിപ്പ്'

ന്യൂഡൽഹി: അഖില ഭാരതീയ ഹിന്ദുമഹാസഭ (എബിഎച്ച്എം) യുടെ ഔദ്യോഗിക വെബ്‌സൈറ്റ് ഹാക്ക് ചെയ്ത് ബീഫ് കറിയുണ്ടാക്കുന്ന രീതി പ്രചരിപ്പിച്ചതായി പരാതി. ഇന്നലെയാണ് ടീം കേരള സൈബർ വാരിയേഴ്‌സ് അഖില ഭാരതീയ ഹിന്ദുമഹാസഭയുടെ വെബ്‌സൈറ്റ് ഹാക്ക് ചെയ്തത്. http://www.abhm.org.in/ എന്ന വെബ്‌സൈറ്റിലാണ് ബീഫ് കറിയുടെ പാചക കുറിപ്പ് പ്രചരിപ്പിച്ചത്.

എബിഎച്ച്എം നേതാവ് സ്വാമി ചക്രപാണിയുടെ വിവാദ പരാമർശത്തിനെതിരെയാണ് വെബ്‌സൈറ്റ് ഹാക്ക് ചെയ്തത്. കേരളത്തിൽ ബീഫ് കഴിക്കാത്തവരെ മാത്രമേ പ്രളയക്കെടുതിയിൽ നിന്ന് രക്ഷിക്കൂ എന്ന് സ്വാമി ചക്രപാണി പ്രഖ്യാപിച്ചിരുന്നു. അതിന് പുറമേ, ആൾക്കാരെ ബഹുമാനിക്കുന്നത് അവരുടെ സ്വഭാവശുദ്ധി മനസിലാക്കിയാണെന്നും അവരുടെ ആഹാരരീതി അനുസരിച്ചല്ലെന്നും വെബ്‌സൈറ്റിൽ പ്രസിദ്ധീകരിച്ചിരുന്നു.

പശുക്കളെ കൊന്ന് കടകളിൽ പ്രദർശിപ്പിച്ചതിനാലാണ് കേരളത്തെ പ്രളയം വിഴുങ്ങിയതെന്ന സ്വാമിയുടെ പ്രസ്താവന ഏറെ വിവാദമായിരുന്നു. വിശുദ്ധമായി കാണേണ്ട പശുവിനെയും പ്രകൃതിയെയും ഉപദ്രവിച്ചതിനാലാണ് കേരളത്തിലെ നിഷ്‌കളങ്കരായ ജനങ്ങൾ പോലും ഇപ്പോൾ ദുരിതമനുഭവിക്കുന്നതെന്ന് ‍ടൈംസ് നൗ ചാനലിന് സ്വാമി ചക്രപാണി നൽകിയ അഭിമുഖത്തിൽ പറഞ്ഞിരുന്നു. പ്രളയക്കെടുതിയിൽ സഹായം വേണ്ടവർ ഇനി ഭാവിയിൽ മാംസം കഴിക്കില്ലെന്നും പശുക്കളെ കൊല്ലില്ലെന്നും ശപഥം ചെയ്യണമെന്നും സ്വാമി ചക്രപാണി പ്രതികരിച്ചിരുന്നു.

സർക്കാരിനോ കോടതിക്കോ ഗോവധത്തിനെതിരെ ഒന്നും ചെയ്യാനാകില്ലെങ്കിൽ പ്രകൃതി ഇങ്ങനെ പ്രതികരിക്കുമെന്നും ചക്രപാണി കൂട്ടിച്ചേർത്തു. പ്രളയദുരിതത്തിൽ അകപ്പെട്ട പത്ത് ലക്ഷത്തിലധികം പേർ ഇന്നും കേരളത്തിലെ വിവിധ ക്യാമ്പുകളിൽ കഴിയുന്നു. 20000 കോടി രൂപയുടെ നഷ്ടമാണ് കേരള സർക്കാർ നിലവിൽ കണക്കാക്കുന്നത്. സർക്കാർ സഹായത്തോടെ കേരള ജനത ഒറ്റക്കെട്ടായി ദുരിതത്തിൽ നിന്ന് കരകയറാൻ ശ്രമം തുടങ്ങി കഴിഞ്ഞു.