സുപ്രീംകോടതിയിൽ ഹാജരാക്കാൻ ഹാദിയയെ ഇന്ന് ഡൽഹിക്ക് കൊണ്ടുപോകും

കോട്ടയം: സുപ്രീംകോടതിയില്‍ ഹാജരാക്കാന്‍ ഹാദിയ എന്ന അഖിലയെ ഇന്ന് ഡൽഹിയിലേക്ക് കൊണ്ടുപോകും. ടി.വി.പുരത്തുള്ള വീട്ടില്‍ നിന്ന് പോലീസിന്‍റെ അകമ്പടിയോടെയാണ് ഹാദിയയെ ഡൽഹിയിലേക്ക് കൊണ്ടുപോകുക.

27-ന് മൂന്നുമണിക്ക് സുപ്രിംകോടതിയില്‍ ഹാജരാക്കാനാണ് അച്ഛന്‍ അശോകനോട് കോടതി നിര്‍ദേശിച്ചിട്ടുള്ളത്. നെടുമ്പാശ്ശേരിയില്‍ നിന്നു പ്രത്യേകം സജ്ജീകരിച്ച വിമനത്തിലാകും ഹാദിയയെ ഡൽഹിയിലെത്തിക്കുക.

സുരക്ഷയ്ക്കായി ഒരു സി.ഐ.യുടെ നേതൃത്വത്തില്‍ പോലീസും ഹാദിയക്കൊപ്പമുണ്ടാകും. ഉന്നത പോലീസുദ്യോഗസ്ഥരും എന്‍.ഐ.എ. ഉദ്യോഗസ്ഥരും കഴിഞ്ഞദിവസം ഹാദിയയുടെ വീട്ടിലെത്തിയിരുന്നു. ഹാദിയ താമസിക്കുന്ന വീടിനു കനത്ത സുരക്ഷയാണ് പോലീസ് ഒരുക്കിയിരിക്കുന്നത്.