ആദ്യം ഷെഫിൻ ജഹാനെ കാണണമെന്ന് ഹാദിയ

സേലം: സുപ്രീം കോടതി നിർദേശപ്രകാരം ഹൗസ് സർജൻസി പഠനം പൂർത്തിയാക്കാൻ ഹാദിയ സേലത്തെ കോളജിലെത്തി. പഠനം പൂർത്തിയാക്കാനാവശ്യമായ പുനഃപ്രവേശന നടപടികൾക്കു ഹാദിയ അപേക്ഷ നൽകും. അതേസമയം, ഷെഫിൻ ജഹാനെ കാണാൻ ആഗ്രഹമുണ്ടെന്ന് ഹാദിയ മാധ്യമപ്രവര്‍ത്തകരോട് പറഞ്ഞു.

തന്റെ നിലപാടുകളിൽ മാറ്റമില്ലെന്നും ഹാദിയ വ്യക്തമാക്കി. മാനസികനില ശരിയല്ലെന്ന വാദത്തെക്കുറിച്ചു ചോദിച്ചപ്പോൾ അതു പരിശോധിക്കാമെന്നാണ് ഹാദിയ പറ‍ഞ്ഞത്. ആറു മാസം വീട്ടിലായിരുന്നു. ഇനി ആദ്യം ഷെഫിനെ കാണാനാണ് ആഗ്രഹമെന്നാണ് മാതാപിതാക്കളെ കാണാൻ ആഗ്രഹമുണ്ടോയെന്ന ചോദ്യത്തിനു ഹാദിയ മറുപടി പറഞ്ഞത്.

ഹാദിയയെ കാണാൻ ഷെഫിനെ അനുവദിക്കുമെന്ന് കോളജ് പ്രിൻസിപ്പൽ അറിയിച്ചിട്ടുണ്ട്. മാതാപിതാക്കളെ കാണാനും ആഗ്രഹമുണ്ട്. സേലത്ത് എത്തിയശേഷം അച്ഛനോടും അമ്മയോടും ഫോണിൽ സംസാരിച്ചെന്നും ഹാദിയ പറഞ്ഞു.