ഹജ് കർമ്മങ്ങൾക്ക് നാളെ തുടക്കം

മക്ക: ഹജ് കർമ്മത്തിനായി സ്വദേശികളും വിദേശികളും ഉൾപ്പെടെ 20 ലക്ഷത്തിലേറെ തീർത്ഥാടകർ മക്കയിലെത്തി. നാളെയാണ് ഹജ്ജ് കർമ്മങ്ങൾ ആരംഭിക്കുന്നത്. മക്കയിൽനിന്നും ഏഴ് കിലോമീറ്റർ അകലെയുള്ള കൂടാര നഗരിയായ മിനായിലേക്ക് തീർത്ഥാടകർ യാത്രതിരിക്കും. തീർത്ഥാടകർക്കായി കൂടാരങ്ങൾ ഒരുങ്ങിക്കഴിഞ്ഞു.

ഇന്ന് രാത്രി മിനായിൽ തങ്ങിയ ശേഷം ശനിയാഴ്ച പുലർച്ചെ തീർത്ഥാടകർ അറഫ ലക്ഷ്യമാക്കി നീങ്ങും. രണ്ട് ലക്ഷം ഇന്ത്യക്കാരുൾപ്പെടെ 18,19790 വിദേശികളാണ് തീർത്ഥാടനത്തിനായി എത്തിയത്. രണ്ട് ലക്ഷത്തിലധികം സ്വദേശി തീർത്ഥാടകരുമുണ്ടെന്ന് അധികൃതർ വ്യക്തമാക്കി. താമസ സൗകര്യം മെച്ചപ്പെടുത്തുന്നതിനായി ഇക്കുറി മിനായിൽ ബഹുനില കൂടാരങ്ങളും ഒരുക്കിയിട്ടുണ്ട്.

മിനായിലെ ജംറയ്ക്ക് സമീപത്തുള്ള കിങ് അബ്ദുല്ല-കിങ് ഖാലിദ് പാലങ്ങൾക്ക് ഇടയിലാണ് ഇന്ത്യയിൽനിന്നുള്ള തീർത്ഥാടകർക്ക് താമസിക്കാൻ തമ്പുകൾ ഒരുക്കിയിരിക്കുന്നത്. ഇന്ന് രാത്രിയോടെ ഇന്ത്യൻ തീർത്ഥാടകർ മിനായിൽ എത്തിച്ചേരും. തീർത്ഥാടകർക്ക് വഴിതെറ്റിയാൽ പരസ്പരം കണ്ടെത്തുന്നതിനായി ഇലക്ട്രോണിക് വളകർ അധികൃതർ വിതരണം ചെയ്തിട്ടുണ്ട്.

കേരളത്തിൽനിന്നുള്ള എഴുപത് ശതമാനത്തോളം തീർത്ഥാടകർക്ക് മശാഇർ മെട്രോ ട്രെയിൻ സേവനം ലഭിക്കും. ഹജ് കർമ്മങ്ങൾ നടക്കുന്ന കേന്ദ്രങ്ങളെ ബന്ധപ്പെടുത്തിയാണ് മെട്രോ ട്രെയിൻ സൗകര്യമുള്ളത്.