സംസ്ഥാനത്ത് ഹര്‍ത്താലിന് തുടക്കമായി; നിരത്തുകൾ വിജനം

തിരുവനന്തപുരം: ഇന്ധനവില വര്‍ധനയില്‍ പ്രതിഷേധിച്ച് സംസ്ഥാനത്ത് ഹര്‍ത്താൽ ആരംഭിച്ചു. യു.ഡി.എഫും എല്‍.ഡി.എഫും ആണ് സംസ്ഥാനത്ത് ഹര്‍ത്താൽ ആഹ്വാനം ചെയ്തിട്ടുള്ളത്. കെഎസ്ആർടിസി ബസുകള്‍ സര്‍വീസ് നടത്തുന്നില്ല. പലയിടങ്ങളിലും വെളുപ്പിന് സ്വകാര്യ വാഹനങ്ങള്‍ നിരത്തിലിറങ്ങിയിരുന്നു. എന്നാൽ പിന്നീട് വാഹന ഗതാഗതം കുറഞ്ഞു. ഇപ്പോൾ പലയിടത്തും നിരത്തുകൾ വിജനമാണ്.

രാവിലെ ആറു മുതല്‍ വൈകീട്ട് ആറുവരെയാണ് ഹര്‍ത്താല്‍. ആശുപത്രികള്‍, പത്രം, പാല്‍ തുടങ്ങിയ അവശ്യസേവനങ്ങളെയും വിനോദസഞ്ചാര മേഖലയെയും ഹര്‍ത്താലില്‍ നിന്ന് ഒഴിവാക്കിയിട്ടുണ്ട്. സ്വകാര്യ ബസുകൾ സര്‍വ്വീസ് നടത്തില്ല. ഇതുവരെ കെ എസ് ആര്‍ടിസി സര്‍വ്വീസ് തുടങ്ങിയിട്ടില്ല. പോലീസ് സംരക്ഷണം ഉറപ്പാക്കിയാൽ കെഎസ് ആര്‍ടിസി സര്‍വ്വീസ് നടത്തിയേക്കും. നിലവിൽ ബസ് സ്റ്റാൻഡിലും റെയിൽവേ സ്റ്റേഷനിലും എത്തുന്ന യാത്രക്കാർക്കായി പോലീസ് അവശ്യ സമാന്തര സർവ്വീസ് നടത്തുന്നുണ്ട്.

വൈകീട്ട് ആറിനുശേഷം നിരത്തുകൾ സജീവമാകും. പ്രളയമുണ്ടായ സ്ഥലങ്ങളിലെ ദുരിതാശ്വാസ പ്രവര്‍ത്തനങ്ങള്‍ സജീവമായി നടക്കുമെന്നും ഹര്‍ത്താലില്‍ അവിടെ യാതൊരു വിധത്തിലുള്ള തടസ്സവുമുണ്ടാകില്ലെന്നും ഇരുമുന്നണികളും വ്യക്തമാക്കിയിരുന്നു. കോണ്‍ഗ്രസ് ദേശീയതലത്തില്‍ ഭാരത ബന്ദിനും ആഹ്വാനം ചെയ്തിട്ടുണ്ട്. രാവിലെ ഒമ്പതുമുതല്‍ മൂന്നുവരെയാണ് ഭാരത ബന്ദ്.