'ഹെഡ്മാസ്റ്റര്‍ സ്ഥലത്തില്ലാത്തതിനാല്‍ ഞങ്ങള്‍ കേരളം ചുറ്റി സഞ്ചരിക്കുകയാണ്'; മുഖ്യമന്ത്രിയെ ട്രോളി കെ രാജു

കണ്ണൂര്‍: മുഖ്യമന്ത്രി പിണറായി വിജയന്റെ വിദേശയാത്രയെ ട്രോളി വനംവകുപ്പ് മന്ത്രി കെ രാജു. ആഴ്ചയില്‍ അഞ്ച് ദിവസം തിരുവനന്തപുരത്ത് ഉണ്ടാകണമെന്ന് ഉത്തരവിട്ട മുഖ്യമന്ത്രി വിദേശയാത്ര പോയതിനാല്‍ മന്ത്രിമാര്‍ കേരളം ചുറ്റുകയാണെന്ന് മന്ത്രി കെ രാജു പറഞ്ഞു. വെള്ളൂര്‍ ക്ഷീരോദ്പാതക സഹകരണ സംഘത്തിന്റെ ക്ഷേമ പദ്ധതികളുടെ ഉദ്ഘാടനം നിര്‍വഹിക്കുന്നതിനിടെയാണ് മന്ത്രി ഈ പരാമര്‍ശം നടത്തിയത്.

'നേരത്തെ മുഖ്യമന്ത്രിയുടെ ഉത്തരവ് കാരണം തിരുവനന്തപുരം വിട്ടുപോകാന്‍ പ്രയാസമായിരുന്നു. ഇപ്പോള്‍ ഹെഡ്മാസ്റ്റര്‍ സ്ഥലത്തില്ല. അതുകൊണ്ട് സംസ്ഥാനമാകെ മാസ്റ്റര്‍മാരായ ഞങ്ങള്‍ ചുറ്റി സഞ്ചരിക്കുകയാണ്', മന്ത്രി പറഞ്ഞു.

എല്‍ഡിഎഫ് സര്‍ക്കാര്‍ അധികാരമേറ്റെടുത്ത ശേഷം മന്ത്രിമാരുടെ യാത്രകള്‍ക്ക് മുഖ്യമന്ത്രി നിയന്ത്രണം ഏര്‍പ്പെടുത്തിയിരുന്നു. പ്രവൃത്തി ദിനങ്ങളില്‍ മന്ത്രിമാര്‍ ഓഫീസില്‍ ഉണ്ടായിരിക്കണമെന്നും മറ്റു ദിവസങ്ങളില്‍ മാത്രം മറ്റു ചടങ്ങുകള്‍ക്ക് പോയാല്‍ മതിയെന്നായിരുന്നു മുഖ്യമന്ത്രിയുടെ നിര്‍ദേശം.

മുഖ്യമന്ത്രി പിണറായി വിജയന്‍, വ്യവസായ മന്ത്രി ഇ പി ജയരാജന്‍, ഗതാഗത മന്ത്രി എ കെ ശശീന്ദ്രന്‍, ഉദ്യോഗസ്ഥര്‍ എന്നിവരാണ് ജപ്പാനിലേക്കും ദക്ഷിണ കൊറിയയിലേക്കുമായി കഴിഞ്ഞയാഴ്ച യാത്ര തിരിച്ചത്.