ആരോഗ്യ വകുപ്പ് റെയ്ഡ്; കുടുങ്ങിയത് 20 വ്യാജ ഡോക്ടർമാർ

തൃശ്ശൂർ: ജില്ലയിലെ വ്യാജ ഡോക്ടർമാരെ കണ്ടെത്താൻ ആരോഗ്യ വകുപ്പ് റെയ്ഡ് ആരംഭിച്ചു. 51 സ്ഥാപനങ്ങൾ പോലീസ് റെയ്ഡ് ചെയ്തു. ഇതിൽ 20 പേർ വ്യാജന്മാരാണെന്ന് കണ്ടെത്തിയതിനെത്തുടർന്ന് പോലീസിന് കൈമാറി. ജില്ലയിലെ വിവിധയിടങ്ങളിൽനിന്ന് നാൽപ്പതിൽ അധികം പരാതികൾ ലഭിച്ചതിന്റെ അടിസ്ഥാനത്തിലാണ് പരിശോധന നടത്താൻ ആരോഗ്യ വകുപ്പ് തയ്യാറായതെന്ന് ഡിഎംഒ ഡോ കെകെ റജീന പറഞ്ഞു.

'ഓപ്പറേഷൻ ക്വാക്ക്' എന്ന പേരിൽ നടത്തിയ റെയ്ഡിൽ 21 സംഘങ്ങളാണ് പങ്കെടുത്തത്. ഓരോ ടീമിലും അലോപ്പതി, ഭാരതീയ ചികിത്സാ വകുപ്പ്, ഹോമിയോ തുടങ്ങിയ വിഭാഗത്തിലെ വിദഗ്ദരേയും ഹെൽത്ത് ഇൻസ്പെക്ടർമാരേയുമാണ് നിയോഗിച്ചത്. രാവിലെ ഒമ്പതിന് തുടങ്ങിയ പരിശോധന രാത്രിവരെ നീണ്ടു.

പരിശോധനയിൽ പല സ്ഥലങ്ങളിലും അനധികൃതമായി ലോഡുകണക്കിന് ആയുർവേദ മരുന്നുകൾ കണ്ടെത്തി. ഡോക്ടർമാർ എന്ന വ്യാജേന ചികിത്സ നടത്തിയിരുന്നത് പ്രഥമിക വിദ്യാഭ്യാസം മുതൽ സെക്കന്ററി തലംവരെ വിദ്യാഭ്യാസം ഉള്ളവരാണെന്നും കണ്ടെത്തിയിട്ടുണ്ട്.