കേരളത്തില്‍ രണ്ടാമത്തെ കൊറോണ സ്ഥിരീകരിച്ച് ആരോഗ്യമന്ത്രി

ആലപ്പുഴ: കേരളത്തില്‍ രണ്ടാമത്തെ കൊറോണ വൈറസ് സ്ഥിരീകരിച്ച് ആരോഗ്യമന്ത്രി കെ കെ ശൈലജ. മുന്നൊരുക്കങ്ങള്‍ ശക്തമാക്കിയതായും എല്ലാ സജ്ജീകരണങ്ങളും ഏര്‍പ്പെടുത്തിയതായും ആരോഗ്യമന്ത്രി അറിയിച്ചു. ആലപ്പുഴയില്‍ നിരീക്ഷണത്തിലുള്ള വിദ്യാര്‍ഥിയ്ക്കാണ് കൊറോണവൈറസ് ബാധ സ്ഥിരീകരിച്ചത്. ആലപ്പുഴ കളക്ടേറ്റില്‍ ചേര്‍ന്ന ഉന്നതതല യോഗത്തിന് ശേഷം മാധ്യമങ്ങളോട് സംസാരിക്കുകയായിരുന്നു ആരോഗ്യമന്ത്രി.

ഐസോലേഷന്‍ വാര്‍ഡില്‍ ചികിത്സയിലാണ് വിദ്യാര്‍ഥി. 'ചൈനയില്‍ നിന്നെത്തിയ മൂന്ന് പേരില്‍ ഒരാള്‍ക്കു കൂടിയാണ് കൊറോണ സ്ഥിരീകരിച്ചത്. രണ്ടാമത്തെ കൊറോണ കേസിന്റെ വിശദമായ പരിശോധന റിപ്പോര്‍ട്ട് ലഭിച്ചു. ആശങ്ക വേണ്ട, ഭയക്കാതെ ഒന്നിച്ച് നേരിടാം', കെ കെ ശൈലജ പറഞ്ഞു.

'ആലപ്പുഴയില്‍ 124 പേരെ വീടുകളില്‍ നിരീക്ഷിക്കുന്നുണ്ട്. 28 ദിവസം അതീവ ജാഗ്രത പുലര്‍ത്തും. രോഗമുള്ളവരോ രോഗ സാധ്യത ഉള്ളവരോ ആയിട്ടുള്ളവര്‍ ആരോഗ്യ വകുപ്പിന്റെ മുന്‍കരുതല്‍ നടപടിയുമായി പൂര്‍ണ്ണമായി സഹകരിക്കണം. ആരും അതില്‍ വീഴ്ച വരുത്തതത്. രോഗ്യവ്യാപനം തടയാനും ആപത്തിലേക്ക് പോകാതിരിക്കാനുമാണ് ആരോഗ്യ വകുപ്പ് ജാഗ്രതാ നിര്‍ദ്ദേശം നല്‍കുന്നത്. അത് എല്ലാവരും മനസ്സിലാക്കി പ്രവര്‍ത്തിക്കണം', ആരോഗ്യമന്ത്രി വ്യക്തമാക്കി. രണ്ടാമത്തെ കൊറോണ കേസ് നിഗമനം മാത്രമെന്ന് ആരോഗ്യമന്ത്രി കെ കെ ശൈലജ ഇന്ന് രാവിലെ വാര്‍ത്താസമ്മേളനത്തില്‍ പറഞ്ഞിരുന്നു. അന്തിമ പരിശോധനാഫലം കിട്ടാതിരുന്നതിനെ തുടര്‍ന്നാണ് സ്ഥിരീകരിക്കാതിരുന്നത്.