സംസ്ഥാനത്ത് വീണ്ടും കനത്ത മഴ: മലയോരമേഖലകളിൽ ഉരുൾപൊട്ടല്‍

കോഴിക്കോട്: സംസ്ഥാനത്ത് വീണ്ടും മഴ കനത്തു. സംസ്ഥാനത്തെ വടക്കൻ ജില്ലകളിലാണ് മഴ നാശം വിതക്കുന്നത്. മലയോരമേഖലകളിൽ പലയിടത്തും ഉരുൾപൊട്ടൽ റിപ്പോർട്ട് ചെയ്യപ്പെട്ടിട്ടുണ്ട്. കോഴിക്കോട് കക്കാടംപൊയിലിൽ മണ്ണിടിച്ചിൽ ഉണ്ടായതിനെ തുടർന്ന് കോടഞ്ചേരി താലൂക്കിലെ സ്കൂളുകൾക്ക് അവധി നൽകി .പലയിടത്തും കൃഷിനാശവും റിപ്പോര്‍ട്ട് ചെയ്യപ്പെട്ടു.

വയനാട്ടിലും നിലമ്പൂരിലും കനത്ത മഴയെത്തുടര്‍ന്ന് ഇന്ന് അവധി നല്‍കിയിരുന്നു.

കണ്ണൂർ ശ്രീകണ്ഠപുരം മേഖലയിൽ കനത്ത വെള്ളപ്പൊക്കം ഉണ്ടായി. സംസ്ഥാനത്തെ ബാവലി, ചീങ്കണ്ണി, കാഞ്ഞിരപുഴകൾ കരകവിഞ്ഞൊഴുകുകയാണ്. കണ്ണൂരിനു കോഴിക്കോടിനും പുറമേ വയനാട്ടിലും കനത്ത മഴ തുടരുകയാണ്. പലയിടത്തും വെള്ളം കയറി

ഡാമുകളിലും പുഴകളിലും ജലനിരപ്പ്‌ ഉയർന്നിട്ടുണ്ട്. ശക്തമായ മലവെള്ളപ്പാച്ചിലിന് സാധ്യതയുളളതിനാൽ മഴ കുറയുന്നത്‌ വരെ ഡാമുകളിലും പുഴകളിലും ഇറങ്ങാതെ സൂക്ഷിക്കാൻ നിർദേശമുണ്ട്.

കനത്ത മഴയും മണ്ണിടിച്ചിലും തുടരുന്നതിനാൽ ജില്ലയിലെ മുഴുവൻ ക്വാറികളുടേയും പ്രവർത്തനം നിർത്തി വെയ്ക്കാനും കളക്ടർ ഉത്തരവിട്ടു. മഴ വീണ്ടും കനത്തതു കാരണം ഇടുക്കി അണക്കെട്ടിലെ ജലനിരപ്പ് ക്രമാതീതമായി ഉയരുകയാണ്.