തോരാമഴയില്‍ മുങ്ങി ചെല്ലാനം ഗ്രാമം; നൂറിലധികം കുടുംബങ്ങള്‍ ദുരിതത്തില്‍

കൊച്ചി: ഞായറാഴ്ച രാവിലെ മുതൽ പെയ്ത കനത്ത മഴയിൽ പടിഞ്ഞാറൻ കൊച്ചിയുടെ താഴ്ന്ന പ്രദേശങ്ങളൊക്കെ വെളളത്തിലായി. ചെല്ലാനത്ത് പലയിടങ്ങളിലും കടല്‍ കയറിയതോടെ നൂറിലധികം കുടുംബങ്ങള്‍ ദുരിതത്തിലായിരിക്കുകയാണ്.

ചെറിയ റോഡുകളെല്ലാം വെള്ളത്തിലായി. പ്രധാന റോഡിലും വെള്ളക്കെട്ടുണ്ട്. പലയിടത്തും വീടുകളിലും വെള്ളം കയറി. ചെല്ലാനത്ത് വേളാങ്കണ്ണി, ബസാർ, കമ്പനിപ്പടി, മറുവക്കാട് മേഖലകളിലാണ് ഇക്കുറിയും കടലേറ്റം രൂക്ഷമായത്.

പലയിടത്തും വീടുകളില്‍ നിന്ന് പുറത്തിങ്ങാന്‍ കഴിയാത്ത വിധം വെള്ളം പൊങ്ങിയിട്ടുണെന്ന് ഗ്രാമവാസികള്‍ പറയുന്നു. കാനകളിൽ അഴുക്ക് കെട്ടിക്കിടക്കുന്നതിനാൽ ഒഴുകിപോവുന്നില്ലെന്നും നാട്ടുകാര്‍ പരാതിപ്പെടുന്നുണ്ട്.

മഴ ദുരിതം വിതക്കുന്നതിനാല്‍ ചെല്ലാനത്തു നിന്ന് ആളുകളെ സുരക്ഷിതമായ ഒരിടത്തേയ്ക്ക് മാറ്റി പാര്‍പ്പിക്കാന്‍ ശ്രമം നടക്കുന്നതായി ചെല്ലാനം വൈസ് പ്രസിഡന്‍റ് കെഡി പ്രസാദ് പറഞ്ഞു. സ്ഥലത്തുളള സെന്‍റ് മേരീസ് സ്കൂള്‍ കെട്ടിടത്തിലേയ്ക്ക് ആളുകളെ മാറ്റാനാണ് തീരുമാനമെന്നും പ്രസാദ് അറിയിച്ചു. ജൂണ്‍ ഒന്നു മുതല്‍ ജൂലായ് 15 വരെ എറണാകുളം ജില്ലയില്‍ മാത്രം 1,263.66 മില്ലീ മീറ്റര്‍ മഴ ലഭിച്ചു