മൂന്നാറിൽ കനത്ത മഴ; മാട്ടുപ്പെട്ടിയിൽ രണ്ടാമത്തെ ഷട്ടറും ഉയര്‍ത്തി

മൂന്നാര്‍: വൃഷ്ടിപ്രദേശത്ത് മഴ കനത്ത് നീരൊഴുക്ക് കൂടിയതോടെ മാട്ടുപ്പെട്ടി ഡാമിന്‍റെ രണ്ടാമത്തെ ഷട്ടറും 50 സെന്‍റിമീറ്റര്‍ ഉയര്‍ത്തി. ഡാമിലെ ജലനിരപ്പ് 1599.20 മീറ്റര്‍ ആയി ഉയര്‍ന്നതോടെ രാവിലെ ഒൻപത് മണിക്കാണ് ഡാമിന്‍റെ ആദ്യ ഷട്ടര്‍ ഉയര്‍ത്തിയത്.

മൂന്നാര്‍ പ്രദേശത്ത് കനത്ത മഴയാണ് ഇന്ന് രാവിലെ മുതൽ അനുഭവപ്പെടുന്നത്. മുതിരപ്പുഴ, കല്ലാര്‍കുട്ടി, ലോവര്‍ പെരിയാര്‍ മേഖലകളിലുള്ളവര്‍ക്ക് ജില്ലാ ദുരന്തനിവാരണ അതോരിറ്റി അതീവസുരക്ഷാനിര്‍ദേശം നല്‍കിയിട്ടുണ്ട്. മൂന്നാര്‍ പ്രദേശത്ത് വെള്ളപ്പൊക്കഭീഷണിയുമുണ്ട്.

അടിമാലി കൊരങ്ങാട്ടി ആദിവാസിമേഖലയിൽ വീണ്ടും മണ്ണിടിച്ചിലുണ്ടായി. ചെറുതോണിയ്ക്ക് സമീപം ചുരുളിയിൽ ഉരുള്‍പൊട്ടി കൃഷിയിടം ഒലിച്ചുപോയി. ആളപായമുണ്ടായിട്ടില്ല.

ഇടുക്കി ഡാമിലേയ്ക്ക് ഇപ്പോള്‍ ഒഴുകിയെത്തുന്നത് 598 ക്യുമെക്സ് വെള്ളമാണ്. ഉച്ചയ്ക്ക് 12 മണിയ്ക്ക് ഇടുക്കി ഡാമിലെ ജലനിരപ്പ് 2396.96 അടിയാണ്. രാവിലെ പത്തുമണിയുടെ ജലനിരപ്പിനേക്കാള്‍ കൂടുതലാണ് ഇത്. ഡാമിൽ നിന്ന് മൂന്ന് ഷട്ടറുകള്‍ വഴി 300 ക്യുമെക്സ് വെള്ളമാണ് ഇപ്പോള്‍ പുറത്തേയ്ക്ക് ഒഴുക്കുന്നത്.