ശബരിമലയിൽ കനത്ത മഴ: ത്രിവേണിയിലെ കടകൾ മുങ്ങി

പത്തനംതിട്ട: സംസ്ഥാനത്ത് മഴക്കെടുതി രൂക്ഷമാകുന്നതിനിടെ പമ്പയിലും ജലനിരപ്പ് ഉയരുന്നു. ജലനിരപ്പ് ക്രമാതീതമായി ഉയർന്നതോടെ പത്തനംതിട്ട ജില്ലയിലെ ഡാമുകളും തുറന്നു വിട്ടു. പമ്പ, കക്കി ഡാമുകളുടെ ഷട്ടറുകൾ ഉയർത്തിയതോടെ കുട്ടനാട് വരെയുള്ള പ്രദേശങ്ങൾ വീണ്ടും പ്രളയ ഭീതിയിലായി. കൊച്ചുപമ്പ, ആനത്തോട് ഡാമുകൾ കൂടി തുറന്നതോടെ പമ്പാ നദിയിൽ ഒരാൾപ്പൊക്കത്തിൽ വെള്ളമുയർന്നു.ശബരിമലയിൽ ശക്തമായ മഴ ഇപ്പോഴും തുടരുകയാണ്.

പമ്പ ത്രിവേണിയിലെ കടകളെല്ലാം വെള്ളത്തിൽ മുങ്ങി. പത്തനംതിട്ട ജില്ലയുടെ പടഞ്ഞാറു ഭാഗങ്ങളിൽ ജലനിരപ്പ് ഉയരുന്നത് ഭീതി പരത്തുന്നുണ്ട്. റാന്നി താലൂക്കിന്റെ താഴ്ന്ന പ്രദേശങ്ങളും വെള്ളത്തിനടിയിലായി. കൂടാതെ കൊല്ലം ജില്ലയിലെ തെന്മല ഡാമിന്റെ ഷട്ടറും തുറന്നു. കല്ലടയാറിന്റെ തീരത്ത് വസിക്കുന്നവർക്ക് ജാഗ്രതാ നിർദേശം നൽകിയിട്ടുണ്ട്.