Kerala Rains: കൊല്ലത്ത് താഴ്ന്ന പ്രദേശങ്ങളിൽ വെള്ളം കയറി; മൺറോ തുരുത്തിൽ വീടുകൾ തകർന്നു: ആളുകളെ മാറ്റിപാർപ്പിച്ചു

കൊല്ലം: കൊല്ലം ജില്ലയിലെ താഴ്ന്ന പ്രദേശങ്ങൾ കനത്ത മഴയിൽ വെള്ളത്തിനടിയിലായി. ജില്ലയുടെ കിഴക്കൻ മേഖലകളിലാണ് മഴ ശക്തമായി തുടരുന്നത്. പത്തനാപുരം ആവണീശ്വരത്ത് 15 ഓളം വീടുകളിൽ നിന്ന് വെള്ളം കയറിയതിനെ തുടർന്ന് ആളുകളെ മാറ്റിപ്പാർപ്പിച്ചു. തെന്മല പരപ്പാർ ഡാമുകളിലേക്കുള്ള വെള്ളത്തിന്റെ ഒഴുക്ക് കൂടിയിട്ടുണ്ട്.

അതിനിടെ, കനത്ത മഴയിൽ മൺറോ തുരുത്തിലെ രണ്ടു വീടുകൾ തകർന്നു. പട്ടം തുരുത്ത് വെസ്റ്റിൽ സുമിയുടെ വീടും കിടപ്പറം വടക്ക് ലീലയുടെ വീടുമാണ് തകർന്നത്. കൊട്ടാരക്കരയിൽ എംസി റോഡിൽ പ്രവർത്തിക്കുന്ന കടകളിലേക്ക് വെള്ളം കയറി. കുന്നിക്കോട് പച്ചില മലയിൽ മണ്ണിടിച്ചിൽ ഉണ്ടാകുമെന്ന ആശങ്കയിലാണ് ജനങ്ങൾ.

കൊല്ലം ജില്ലയുടെ പല ഭാഗങ്ങളിലും തോടുകളും കനാലുകളും കരകവിഞ്ഞ് ഒഴുകുന്നുണ്ട്. പത്തനാപുരത്ത് ഏലകളും, നെടുവത്തൂരും വെള്ളത്തിനടിയിലായി. കൂരംകോട് നന്ദിഗ്രാമിൽ പത്തിലധികം വീടുകളിൽ വെള്ളം കയറിയതിനെ തുടർന്ന് ആളുകളെ മാറ്റിപ്പാർപ്പിച്ചു. കൊട്ടാരക്കര താലൂക്കിലും പുനലൂർ നഗരസഭയിലെ വിദ്യാഭ്യാസസ്ഥാപനങ്ങൾക്കും കൊല്ലം ജില്ലാ കളക്ടർ അവധി പ്രഖ്യാപിച്ചിരിക്കുകയാണ്.


അതിനിടെ, സംസ്ഥാനത്ത് ഇപ്പോൾ വ്യാപകമായി ലഭിച്ചു കൊണ്ടിരിക്കുന്ന കനത്ത മഴക്ക് പിന്നാലെ രണ്ടു ന്യൂനമർദ്ദങ്ങൾ രൂപപ്പെടുന്നതായി സൂചന. ന്യൂനമർദ്ദങ്ങളിൽ ഒന്ന് കേരളത്തിനും ലക്ഷദ്വീപിനുമിടയിലും മറ്റൊന്ന് ബംഗാൾ ഉൾക്കടലിലുമാണ് രൂപപ്പെടുന്നത്. ഇവ രണ്ടും അതിശക്തമായ മഴ സംസ്ഥാനത്ത് ലഭ്യമാക്കുമെന്നാണ് കാലാവസ്ഥാ നിരീക്ഷണ കേന്ദ്രം നൽകുന്ന മുന്നറിയിപ്പെന്ന് മനോരമ റിപ്പോർട്ട് ചെയ്തു.



ഒക്ടോബർ അവസാനത്തോടെയും നവംബർ ആദ്യത്തോടെയും കേരളത്തിൽ ശക്തമായ മഴക്ക് ഇടയാക്കുന്ന മറ്റൊരു ന്യൂനമർദ്ദം ശ്രീലങ്കയ്ക്കും കന്യാകുമാരിക്കും ഇടയിൽ രൂപപ്പെടുമെന്ന് അമേരിക്കയിലെയും ചൈനയിലെയും കാലാവസ്ഥാ നിരീക്ഷണകേന്ദ്രങ്ങൾ മുന്നറിയിപ്പ് നൽകുന്നു. ഇത്തവണ തുലാമഴ ഡിസംബർ വരെ നീണ്ടു പോയേക്കാനുള്ള സാധ്യതയുണ്ടെന്നും മുന്നറിയിപ്പുണ്ട്. അതേ സമയം, മഴ കനത്തതിനെ തുടർന്ന് കൊച്ചിയിൽ ദുരിതാശ്വാസ ക്യാമ്പുകൾ തുറന്നു.