ബത്തേരിയിൽ കനത്ത മഴ; വീടുകളിൽ വെള്ളം കയറി

സുൽത്താൻബത്തേരി: വയനാട് ജില്ലയിൽ പെയ്ത കനത്ത മഴയിൽ ബത്തേരി ടൗണും പരിസരപ്രദേശങ്ങളും വീണ്ടും വെള്ളത്തിലായി. വീടുകളിലും വ്യാപാരസ്ഥാപനങ്ങളിലും വെള്ളം കയറുകയും വ്യാപകനാശനഷ്ടമുണ്ടാകുകയും ചെയ്തു. ചൊവ്വാഴ്ച ഉച്ചയോടെ ആരംഭിച്ച ശക്തമായ മഴ രാത്രിയിലും തുടര്‍ന്നു. വെള്ളം കയറിയ വീടുകളിലെ നിരവധി കുടുംബങ്ങളെ മാറ്റിപ്പാര്‍പ്പിച്ചു.

സുൽത്താൻബത്തേരി ടൗണിൽ ഗാന്ധി ജങ്ഷനിലും കാഞ്ഞിരാണ്ടി ടെക്സ്റ്റൈൽസിനു സമീപവും മാനിക്കുനിയിലെ മത്സ്യ-മാംസമാര്‍ക്കറ്റ് എന്നിവിടങ്ങളിലും വെള്ളം കയറിയത്. വെള്ളം കയറിയതിനെത്തുടര്‍ന്ന് വീട്ടിൽ ഒറ്റപ്പെട്ടു പോയ വയോധികനായ വിൻസന്‍റ് ഡിക്രൂസിനെ ഫയര്‍ഫോഴ്സും നാട്ടുകാരും ചേര്‍ന്ന് രക്ഷപെടുത്തി.

കുനിപ്പുര പണിയകോളനിയിലെ പതിനാല് കുടുംബങ്ങളിൽ നിന്നായി 38 പേരെ അമ്മായിപ്പാലം പഴം - പച്ചക്കറി സംഭരണകേന്ദ്രത്തിലേയ്ക്ക് മാറ്റി.

കൈപ്പഞ്ചേരിയിൽ താലൂക്ക് ആശുപത്രിയുടെ പിന്നിലുള്ള അഞ്ച് വീടുകളിലും മൈതാനിക്കുന്നിലെ നാല് വീടുകളഇലും വെള്ളം കയറി. ഇവിടങ്ങളിലുള്ളവരെ സുരക്ഷിതസ്ഥാനങ്ങളിലേയ്ക്ക് മാറ്റി. പല സ്ഥലങ്ങളിലും പോലീസും ഫയര്‍ഫോഴ്സും എത്തിയാണ് ആളുകളെ മാറ്റിയത്. ജില്ലയിൽ വ്യാപക കൃഷിനാശവും ഉണ്ടായിട്ടുണ്ട്.