ഇന്നു മുതൽ കനത്ത മഴ; ദുരന്ത നിവാരണസേന സംസ്ഥാനത്ത്

തിരുവനന്തപുരം: അറബിക്കടലിൽ രൂപപ്പെട്ട ന്യൂനമര്‍ദ്ദം ശനിയാഴ്ച വൈകിട്ടോ ഞായറാഴ്ച പുലര്‍ച്ചയോ ചുഴലിക്കാറ്റായി മാറിയേക്കുമെന്ന് കാലാവസ്ഥാവകുപ്പ്. എന്നാൽ ലക്ഷദ്വീപിനു സമീപത്തു നിന്ന് ഒമാൻ തീരത്തേയ്ക്ക് നീങ്ങുന്നതിനാൽ ചുഴലിക്കാറ്റ് കേരളത്തെ നേരിട്ട് ബാധിക്കില്ല. ന്യൂനമര്‍ദ്ദം കാരണം കേരളത്തിൽ കനത്ത മഴയ്ക്ക് സാധ്യതയുണ്ട്.

ശനിയാഴ്ച മുതൽ ചൊവ്വാഴ്ച വരെ അതിശക്തമായ മഴയാണ് സംസ്ഥാനത്ത് പ്രതീക്ഷിക്കുന്നത്. ഞായറാഴ്ച മണിക്കൂറിൽ 21 സെന്‍റിമീറ്റര്‍ വരെ മഴ പ്രതീക്ഷിക്കുന്നുണ്ട്. ഇത് കണക്കിലെടുത്ത് ഞായറാഴ്ച ഇടുക്കി, മലപ്പുറം ജില്ലകളിൽ നേരത്തെ തന്നെ റെഡ് അലര്‍ട്ട് പ്രഖ്യാപിച്ചിട്ടുണ്ട്. ഇടുക്കിയിലും മലപ്പുറത്തും തിങ്കളാഴ്ച ഓറഞ്ച് അലര്‍ട്ടുമുണ്ട്. പത്തനംതിട്ട, വയനാട് ജില്ലകളിൽ ഞായറാഴ്ച വരെയും പാലക്കാട് തിങ്കളാഴ്ച വരെയും ഓറഞ്ച് അലര്‍ട്ട് നല്‍കിയിട്ടുണ്ട്.

അതിശക്തമായ മഴ മൂലം ശനി, ഞായര്‍ ദിവസങ്ങളിൽ കേരളത്തിൽ ഉരുള്‍പൊട്ടലിനും താഴ്ന്ന സ്ഥലങ്ങളില്‍ വെള്ളപ്പൊക്കത്തിനും സാധ്യതയുണ്ടെന്നാണ് കാലാവസ്ഥാ നിരീക്ഷണ ഏജൻസിയായ സ്കൈമെറ്റിന്‍റെ വിലയിരുത്തൽ.

കനത്ത മഴയും ചുഴലിക്കാറ്റും മുന്നിൽക്കണ്ട് ദേശീയ ദുരന്ത നിവാരണസേനയുടെ 45 പേരടങ്ങുന്ന അഞ്ച് സംഘങ്ങള്‍ സംസ്ഥാനത്ത് എത്തിയിട്ടുണ്ട്. ഇടുക്കി, വയനാട്, മലപ്പുറം ജില്ലകളിൽ നാല് സംഘങ്ങളെ വിന്യസിക്കുകയും ഒരു സംഘം തൃശൂരിൽ ക്യാംപ് ചെയ്യുകയും ചെയ്യും.