അന്തരീക്ഷച്ചുഴി: സംസ്ഥാനത്ത് കനത്ത മഴ അഞ്ച് ദിവസം കൂടി

തിരുവനന്തപുരം: ഒഡീഷ തീരത്ത് രൂപപ്പെട്ട അന്തരീക്ഷച്ചുഴി മൂലം സംസ്ഥാനത്ത് അഞ്ച് ദിവസം കൂടി കനത്ത മഴ തുടരുമെന്ന് കാലാവസ്ഥാമുന്നറിയിപ്പ്. വ്യാഴാഴ്ച വരെ ശക്തമായ കാറ്റും മഴയുമുണ്ടാകുമെന്നും കാലാവസ്ഥാ നിരീക്ഷണകേന്ദ്രം അറിയിച്ചു.

സംസ്ഥാനത്ത് മൺസൂൺ ശക്തിപ്രാപിച്ചിട്ടുണ്ട്. തിങ്കളാഴ്ച രാത്രിയോടെ തുടങ്ങിയ മഴ ഇന്നും മിക്കയിടങ്ങളിലും ശക്തമായി തുടരുകയാണ്. മത്സ്യത്തൊഴിലാളികള്‍ കടലിൽ പോകരുതെന്നും നിര്‍ദേശം നല്‍കിയിട്ടുണ്ട്.

ജലനിരപ്പ് ഉയര്‍ന്നതോടെ നെയ്യാര്‍ ഡാമിന്‍റെ നാല് ഷട്ടറുകള്‍ തുറന്നു. മലയോരമേഖലകളിൽ മഴ വൻനാശം വിതച്ചിട്ടുണ്ട്. നദീതീരങ്ങളിൽ താമസിക്കുന്നവര്‍ ജാഗ്രത പാലിക്കണം. തിരുവനന്തപുരം, ആലപ്പുഴ, പത്തനംതിട്ട, കണ്ണൂര്‍, ഇടുക്കി, കോഴിക്കോട് ജില്ലകളിലാണ് മഴ ഏറ്റവും ശക്തം. മോശം കാലാവസ്ഥയെത്തുടര്‍ന്ന് തിരുവനന്തപുരത്തും കണ്ണൂര്‍ ജില്ലയിലെ ജില പ്രദേശങ്ങളിലും കളക്ടര്‍മാര്‍ സ്കൂളുകള്‍ക്ക് അവധി നല്‍കിയിട്ടുണ്ട്.