കനത്ത മഴ വൈദ്യുതി ബോർഡിന് സമ്മാനിച്ചത് 750 കോടി

കോട്ടയം: കനത്ത മഴയിൽ സംസ്ഥാനതത്തെ അണക്കെട്ടുകളിൽ ഒഴുകിയെത്തിയ വെള്ളം കേരളത്തിന് സമ്മാനിക്കുക 750 കോടി രൂപ മൂല്യമുള്ള വൈദ്യുതി. പ്രതിവര്‍ഷം 12000 കോടി രൂപയുടെ വൈദ്യുതി ഇടപാടാണ് കെഎസ്ഇബി നടത്തുന്നതെന്നും ഇതിൽ 750 കോടി രൂപയുടെ ലാഭം അതിവര്‍ഷം മൂലം ലഭിക്കുമെന്നും മനോരമ റിപ്പോര്‍ട്ട് ചെയ്യുന്നു.

മുൻവര്‍ഷം 12800 കോടി രൂപ ചെലവഴിച്ച വൈദ്യുതിബോര്‍ഡിന് 800 കോടി രൂപയുടെ കമ്മിയുണ്ടായിരുന്നു. എന്നാൽ കനത്ത മഴ ഈ കമ്മി നികത്താൻ പര്യാപ്തമാണ്. 1500 ദശലക്ഷം യൂണിറ്റ് വൈദ്യുതി ഉത്പാദിപ്പിക്കാനുള്ള വെള്ളമാണ് അണക്കെട്ടുകളിൽ ഒഴുകിയെത്തിയത്. ശരാശരി അഞ്ച് രൂപയ്ക്കാണ് വൈദ്യുതി ബോര്‍ഡ് ഒരു യൂണിറ്റ് വൈദ്യുതി വിൽക്കുന്നത്.

അതേസമയം, അധികമായി ഒഴുകിയെത്തിയ വെള്ളം കേരളത്തിന്‍റെ മൊത്തം ഉപയോഗത്തിന്‍റെ ആറുശതമാനം മാത്രമാണ്. നല്ല മഴ ലഭിച്ചാലും അത് സംഭരിച്ച് വെച്ച് വൈദ്യുതിയാക്കാനുള്ള ശേഷിയുള്ളത് ഇടുക്കി, ശബരിഗിരി പദ്ധതികള്‍ക്ക് മാത്രമാണ്. ബാക്കി 22 ഡാമുകളിലും ചെറിയ തോതിലുള്ള ഉത്പാദനമാണ് നടക്കുന്നത്.