സംസ്ഥാനത്ത് രണ്ട് ദിവസം കൂടി അതിശക്തമായ മഴ; ഈ ജില്ലകളിൽ യെല്ലൊ അലേർട്ട്

തിരുവന്തപുരം: സംസ്ഥാനത്ത് രണ്ട് ദിവസം കൂടി ശക്തമായ മഴ തുടരും. വടക്കൻ കേരളത്തിൽ നാളെ മുതൽ മഴ ശക്തമാകും. തൃശൂർ മുതൽ കാസർകോട് വരെയുള്ള ഏഴ് ജില്ലകളിൽ യെല്ലൊ അലേർട്ട് പ്രഖ്യാപിച്ചു.

Also Read: കേരളത്തിൽ ഇന്ന് 6244 പേർക്ക് കൊവിഡ്-19 സ്ഥിരീകരിച്ചു; 7792 രോഗമുക്തി

തെലങ്കാനയ്‌ക്ക് മുകളിൽ തീവ്രന്യൂനമർദ്ദം നിലനിൽക്കുകയാണ്. നാളെ വൈകീട്ടോടെ ന്യൂനമർദ്ദം മുംബൈ തീരംവഴി അറബിക്കടലിൽ പ്രവേശിക്കും. ഇതോടെ കേരളത്തിൽ മഴ ശക്തമാകാനുള്ള സാധ്യത കൂടുതലാണ്. മണിക്കൂറിൽ 55 കിലോമീറ്റർ വേഗത്തിൽ കാറ്റുവിശാനിടയുള്ളതിനാൽ കേരളാ തീരത്ത് മത്സ്യബന്ധനത്തിന് പോകരുതെന്ന് അധികൃതർ നിർദേശം നൽകി.

ഇന്ന് എട്ട് ജില്ലകളിൽ യെല്ലോ അലേർട്ട് പ്രഖ്യാപിച്ച സാഹചര്യത്തിൽ ഇടുക്കിയിൽ മഴ ശക്തമായി തുടരുകയാണ്. വരും ദിവസങ്ങളിൽ മഴ കൂടുതൽ ശക്തമാകുമെന്നാണ് അധികൃതർ നൽകുന്ന മുന്നറിയിപ്പ്. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, കണ്ണൂർ, കാസർകോട് ജില്ലകളിലാണ് ഇന്ന് യെല്ലോ അലേർട്ട് പ്രഖ്യാപിച്ചത്.

Also Read: ജോസ് കെ മാണിയുടേത് രാഷ്ട്രീയ വഞ്ചന; ഇതെന്ത് തരം രാഷ്ട്രീയമെന്ന് ചെന്നിത്തല

സംസ്ഥാനത്ത് വെള്ളിയാഴ്‌ചവരെ ശക്തമായ മഴ തുടരുമെന്ന് മുന്നറിയിപ്പ് നിലവിലുണ്ട്. വ്യാഴാഴ്ച തൃശൂർ, പാലക്കാട്, മലപ്പുറം, വയനാട്, കോഴിക്കോട്, കണ്ണൂർ, കാസർകോട് ജില്ലകളിൽ യെലോ അലേർട്ട് പുറപ്പെടുവിച്ചിട്ടുണ്ട്. ബംഗാൾ ഉൾക്കടലിൽ രൂപംകൊണ്ട തീവ്ര ന്യൂനമർദ്ദം ആന്ധ്രാ തീരം വഴി കരയിൽ പ്രവേശിച്ചതായി കാലാവസ്ഥാ നിരീക്ഷണ കേന്ദ്രം വ്യക്തമാക്കി. കൂടാതെ, ബംഗാൾ ഉൾക്കടലിൽ മറ്റൊരു ന്യൂനമർദ്ദം കൂടി രൂപപ്പെട്ടേക്കുമെന്ന് സംശയിക്കുന്നുണ്ട്.