22 ദിവസത്തെ ജയില് ശിക്ഷ അയ്യപ്പവിശ്വാസികളുടെ പ്രിയങ്കരനായി മാറി
ശബരിമലയിലെ യുവതീ പ്രവേശന വിധിയെ തുടര്ന്ന് ഇടതുസര്ക്കാരിന്റെ നിലപാടില് പ്രതിഷേധിച്ചുകൊണ്ട് സമരമുഖങ്ങളില് ശ്രദ്ധേയനായ ആളാണ് കെ സുരേന്ദ്രന്. ശബരിമല ദര്ശനത്തിനെത്തിയ കെ സുരേന്ദ്രന് അറസ്റ്റിലായിരുന്നു. ജാമ്യം ലഭിക്കാതെ 22 ദിവസമാണ് സുരേന്ദ്രന് ജയില് കഴിഞ്ഞത്. എന്നാല്, ഇതിലൂടെ അയ്യപ്പ ഭക്തരുടെ ഹൃദയത്തില് കേറിപ്പറ്റി.
തെരഞ്ഞെടുപ്പുകളില് ഏറ്റുവാങ്ങിയ തുടര് പരാജയങ്ങള്
മത്സരിച്ച തെരഞ്ഞെടുപ്പുകളിലെല്ലാം പരാജയങ്ങളാണ് കെ സുരേന്ദ്രന് ഏറ്റുവാങ്ങിയിട്ടുള്ളത്. ലോക്സഭയിലേക്ക് കാസര്കോട് മണ്ഡലത്തില് നിന്നും രണ്ടു തവണയും മത്സരിച്ച സുരേന്ദ്രന് മഞ്ചേശ്വരത്ത് 89 വോട്ടിനാണ് പരാജയപ്പെട്ടത്. ഒന്നേകാല് ലക്ഷത്തില്പരം വോട്ടുകള് സ്വന്തമാക്കിയ സുരേന്ദ്രന് മികച്ച പ്രകടനം ആണ് കാഴ്ചവെച്ചത്. 2011 ലെ നിയമസഭാ തെരഞ്ഞെടുപ്പില് മഞ്ചേശ്വരത്തെ ബിജെപി സ്ഥാനാര്ഥിയായിരുന്നു സുരേന്ദ്രന്. അന്ന് 33.8 ശതമാനം വോട്ടുകള് നേടി.
ശബരിമല ആയുധമാക്കിയുള്ള 2019 ലെ തെരഞ്ഞെടുപ്പ്
ശബരിമല സമരം ആയുധമാക്കികൊണ്ടാണ് ബിജെപി നേതൃത്വം സംസ്ഥാനത്ത് തെരഞ്ഞെടുപ്പ് പ്രചാരണം നടത്തിയത്. ശബരിമല യുവതീ പ്രവേശനം സുവര്ണ്ണാവസരമാണെന്ന് മുന് സംസ്ഥാന പ്രസിഡന്റ് പി എസ് ശ്രീധരന്പിള്ള പറയുകയുണ്ടായി. 2019 ലെ ലോക്സഭ തെരഞ്ഞെടുപ്പില് ശബരിമല ഉള്പ്പെടുന്ന പത്തനംതിട്ട മണ്ഡലത്തില് നിന്നായിരുന്നു സുരേന്ദ്രന് മത്സരിച്ചത്. എന്നാല്, മൂന്നാം സ്ഥാനം കൊണ്ട് തൃപ്തിപ്പെടേണ്ടി വന്നു സുരേന്ദ്രന്. മൂന്ന് ലക്ഷത്തിനടുത്ത് വോട്ടുകള് കെ സുരേന്ദ്രന് നേടി. 2019 ലെ കോന്നി തെരഞ്ഞെടുപ്പിലും മൂന്നാം സ്ഥാനത്തേക്ക് തള്ളപ്പെടുകയായിരുന്നു. എന്നാല്, ബിജെപിയുടെ വോട്ടുകള് 17 ശതമാനത്തോളം വര്ദ്ധിപ്പിക്കാന് കെ സുരേന്ദ്രന് സാധിച്ചു. അതേസമയം, 2009 നേക്കാള് മെച്ചപ്പെട്ട പ്രകടനമാണ് 2014 ലെ ലോക്സഭാ തെരഞ്ഞെടുപ്പില് കെ സുരേന്ദ്രന് കാഴ്ചവെച്ചത്. 2016 ലെ നിയമസഭാ തെരഞ്ഞെടുപ്പില് തിരുവനന്തപുരം മണ്ഡലത്തില് സുരേന്ദ്രനെ മത്സരിപ്പിക്കാനായിരുന്നു പാര്ട്ടി തീരുമാനം. എന്നാല്, മഞ്ചേശ്വരം തെരഞ്ഞെടുക്കുകയായിരുന്നു. വെറും 89 വോട്ടുകള്ക്കാണ് സുരേന്ദ്രന്റെ തോല്വി.
പാര്ട്ടിയെ നാഥനില്ലാ കളരിയാക്കിയ വിഭാഗീയത
മുന് ബിജെപി സംസ്ഥാന അധ്യക്ഷന് പി എസ് ശ്രീധരന്പിള്ളയെ മിസോറാം ഗവര്ണറായി ചുമതലയേറ്റതിനു ശേഷം നാഥനില്ല കളരി പോലെ ആയിരുന്നു ബിജെപി. ഇത് പാര്ട്ടിയുടെ പ്രവര്ത്തനങ്ങളെ ദോഷകരമായി ബാധിച്ചിരുന്നു. പാര്ട്ടിക്കുള്ളിലെ ഗ്രൂപ്പ് തര്ക്കങ്ങള് കാരണമാണ് സംസ്ഥാന അധ്യക്ഷനെ തെരഞ്ഞെടുക്കുന്നത് ഇത്രയേറെ വൈകാനുള്ള പ്രധാന കാരണം. പൗരത്വ നിയമ ഭേദഗതിയ്ക്കെതിരെയുള്ള പ്രചാരണങ്ങളെ ചെറുക്കാനുള്ള നീക്കത്തിനു പോലും നേതാവില്ലാത്ത അവസ്ഥയായിരുന്നു കേരളത്തിലെ ബിജെപിയ്ക്ക്. ബിജെപിയ്ക്കുള്ളിലെ വി മുരളീധര പക്ഷവും കൃഷ്ണദാസ് പക്ഷവും തമ്മിലായിരുന്നു അധ്യക്ഷ പദവിയ്ക്ക് വേണ്ടിയുള്ള വടംവലി. എം ടി രമേശിനനെ ആണ് കൃഷ്ണദാസ് പക്ഷം അധ്യക്ഷ സ്ഥാനത്തേക്ക് നിര്ദേശിച്ചതെങ്കില് കെ മുരളീധര പക്ഷം സുരേന്ദ്രനെയാണ് നിര്ദേശിച്ചത്. എന്നാല്, ഗ്രൂപ്പുകള് തമ്മില് യാതൊരു സമവായത്തിലും എത്താതിനെ തുടര്ന്നാണ് കേന്ദ്രസര്ക്കാര് ഇടപെട്ടത്.
സോളാര് കേസും ഉള്ളിക്കറിയും ബീഫും ട്രോളുകളും
സംസ്ഥാന ബിജെപിയില് സോഷ്യല് മീഡിയകളില് ഏറ്റവും കൂടുതല് ട്രോളുകള് നേരിട്ടിട്ടുള്ള രാഷ്ട്രീയ നേതാക്കളില് ഒരാളാണ് കെ സുരേന്ദ്രന്. സോളാര് വിവാദ കാലത്താണ് കെ സുരേന്ദ്രന് ഏറ്റവും കൂടുതല് ശ്രദ്ധേയനായത്. സോളാറില് നിര്ണായക രേഖകള് തന്റെ കൈവശം ഉണ്ടെന്ന് ചാനല് ചര്ച്ചകളില് ഉടനീളം അവകാശവാദം ഉന്നയിച്ച നേതാവായിരുന്നു കെ സുരേന്ദ്രന്. എന്നാല് ഒരു രേഖ പോലും പുറത്തുവിട്ടിട്ടില്ല. ഇതോടെ ട്രോള് ഗ്രൂപ്പുകളിലെ സജീവ സാന്നിധ്യമായി മാറി സുരേന്ദ്രന്. ബീഫ് കഴിക്കുന്നുവെന്ന തരത്തില് കെ സുരേന്ദ്രന്റെ ഒരു ചിത്രം വ്യാപകമായി പ്രചരിക്കപ്പെട്ടിരുന്നു. എന്നാല്, താന് ഉള്ളിക്കറിയാണ് കഴിച്ചതെന്നായിരുന്നു അദ്ദേഹത്തിന്റെ വിശദീകരണം. ഇതേതുടര്ന്ന്, സുരേന്ദ്രന് ഒരു വിളിപ്പേരും കിട്ടി. ബീഫ് നിരോധനവുമായി ബന്ധപ്പെട്ട വിവാദങ്ങളില് കേരളത്തില് ബിജെപി ഏറെ പ്രതിരോധത്തിലാഴ്ത്തിയതും ഇതു തന്നെയാണ്. ശബരിമല വിഷയത്തില് സുരേന്ദ്രന് പുതിയ വിവാദത്തിന് വഴിയൊരുക്കി. ശബരിമലയില് സ്ത്രീകളെ പ്രവേശിപ്പിക്കണം എന്ന അഭിപ്രായക്കാരനായിരുന്നു അദ്ദേഹം. ഇതുമായി ബന്ധപ്പെട്ട് ഒരു ഫേസ്ബുക്ക് പോസ്റ്റും വര്ഷങ്ങള്ക്കു മുമ്പ് പങ്കുവെച്ചിരുന്നു. എന്നാല്, ശബരിമല യുവതി പ്രവേശന വിധി വന്നപ്പോള് എല്ലാം മാറി. പോസ്റ്റുമില്ല, വാദവുമില്ല. ഫേസ്ബുക്ക് പോസ്റ്റ് അദ്ദേഹം ഡിലീറ്റ് ചെയ്തു. പിന്നീട്, സ്ത്രീ പ്രവേശന വിധിക്കെതിരെ സമരമുഖത്തെ ശക്തനായ നേതാവായി മാറി.