കതിരൂര്‍ മനോജ് വധക്കേസ്: സര്‍ക്കാരിനെ വിമര്‍ശിച്ച് ഹൈക്കോടതി

കൊച്ചി: കതിരൂര്‍ മനോജ് വധക്കേസിൽ സര്‍ക്കാരിന് ഹൈക്കോടതിയുടെ വിമര്‍ശനം. കേസിൽ സംസ്ഥാന സര്‍ക്കാരിന്‍റെ അനുമതിയില്ലാതെയാണ് യുഎപിഎ ചുമത്തിയതതെന്ന് ആരോപിച്ച് സിപിഎം കണ്ണൂര്‍ ജില്ലാ സെക്രട്ടറി പി ജയരാജൻ അടക്കമുള്ളവര്‍ സമര്‍പ്പിച്ച ഹര്‍ജിയിൽ സര്‍ക്കാര്‍ നല്‍കിയ സത്യവാങ്മൂലത്തിലെ പരാമര്‍ശനങ്ങളാണ് കോടതിയുടെ വിമര്‍ശനത്തിന് ഇടയാക്കിയത്.

സര്‍ക്കാര്‍ അനുമതി വാങ്ങിയതിനു ശേഷമായിരിക്കണം കതിരൂര്‍ മനോജ് വധക്കേസിൽ യുഎപിഎ ചുമത്തേണ്ടതെന്ന നിലപാടായിരുന്നു സര്‍ക്കാര്‍ സത്യവാങ്മൂലത്തിൽ സ്വീകരിച്ചത്. അതിനാൽ സിബിഐ തയ്യാറാക്കിയ നിലവിലെ റിപ്പോര്‍ട്ട് നിലനിൽക്കില്ലെന്നാണ് സര്‍ക്കാര്‍ പറഞ്ഞത്.

എന്നാല്‍ യുഎപിഎ ചുമത്തിയതിന് എതിരായ സര്‍ക്കാര്‍ സത്യവാങ്മൂലം എങ്ങനെ നിലനില്‍ക്കുമെന്നായിരുന്നു കോടതിയുടെ ചോദ്യം. പ്രതികളെ രക്ഷിക്കാനാണോ സര്‍ക്കാര്‍ ശ്രമമെന്നും ഹൈക്കോടതി ചോദിച്ചു.