വരാപ്പുഴ കസ്റ്റഡി മരണം: സര്‍ക്കാരിന് കോടതിയുടെ വിമര്‍ശനം

കൊച്ചി: വരാപ്പുഴ സ്വദേശി ശ്രീജിത്ത് പോലീസ് കസ്റ്റഡിയിൽ മരിച്ച സംഭവത്തിൽ സര്‍ക്കാരിന് ഹൈക്കോടതിയുടെ വിമര്‍ശനം. പോലീസിനെതിരായ കേസ് പോലീസ് തന്നെ അന്വേഷിക്കുന്നത് ശരിയായ നിലപാടല്ലെന്നായിരുന്നു കോടതിയുടെ നിരീക്ഷണം. സിബിഐയോട് കേസ് ഏറ്റെടുക്കുന്നതിൽ നിലപാടറിയിക്കണമെന്നും ഹൈക്കോടതി നിര്‍ദേശിച്ചു. അതേസമയം, അന്വേഷണം ശരിയായ ദിശയിലാണെന്ന് സര്‍ക്കാര്‍ കോടതിയെ അറിയിച്ചു.

ശ്രീജിത്തിന്‍റെ കസ്റ്റഡി മരണം സിബിഐ അന്വേഷിക്കണമെന്ന് ആവശ്യപ്പെട്ട് ഭാര്യ അഖില സമര്‍പ്പിച്ച ഹ‍ര്‍ജി പരിഗണിക്കവേയാണ് ഹൈക്കോടതിയുടെ നിര്‍ദേശം. ശ്രീജിത്തിനെ പ്രതി ചേര്‍ത്തതിനും അറസ്റ്റ് ചെയ്തതിലും ബാഹ്യ ഇടപെടൽ ഉണ്ടോയെന്ന് പരിശോധിക്കണമെന്നും ഹര്‍ജിയിൽ ആവശ്യപ്പെട്ടിട്ടുണ്ട്. കേസിൽ സിപിഎം നേതാക്കളുടെ ഇടപെടൽ അന്വേഷിക്കണമെന്നും ഒരുകോടി രൂപ നഷ്ടപരിഹാരം നല്‍കണണെന്നും അഖില ആവശ്യപ്പെട്ടിട്ടുണ്ട്.