പിറവം പള്ളി കേസ്: ഹൈക്കോടതി ഡിവിഷൻ ബെഞ്ച് പിന്മാറി

പിറവം പള്ളി തര്‍ക്കം സംബന്ധിച്ച കേസ് പരിഗണിക്കുന്ന ജസ്റ്റിസുമാരായ ദേവൻ രാമചന്ദ്രനും പി ആര്‍ രാമചന്ദ്രമേനോനും പിൻമാറി. ജസ്റ്റിസ് ദേവൻ രാമചന്ദ്രൻ അഭിഭാഷകനായിരിക്കേ യാക്കോബായ വിഭാഗത്തിനു വേണ്ടി കോടതിയിൽ ഹാജരായ വിവരം ചൂണ്ടിക്കാട്ടി ഒരു ഹര്‍ജി കോടതിയിൽ ഹാജരാക്കിയ സാഹചര്യത്തിലാണ് പിന്മാറ്റം. കോടതിയുടെ നിഷ്പക്ഷത ഭാവിയിൽ ചോദ്യം ചെയ്യപ്പെടാതിരിക്കാനാണ് പിന്മാറിയതെന്ന് ജസ്റ്റിസുമാര്‍ വിശദീകരിച്ചു.

പിറവം പള്ളിയുടെ ഉടമസ്ഥത ഓര്‍ത്തഡോക്സ് വിഭാഗത്തിനാണെന്ന സുപ്രീം കോടതിവിധി നടപ്പാക്കാൻ എത്തിയ പോലീസ് സംഘത്തിന് ഇന്നലെ വിശ്വാസികളുടെ പ്രതിഷേധത്തെ തുടര്‍ന്ന് പിന്മാറേണ്ടി വന്നിരുന്നു. പള്ളിയുടെ ഗേറ്റിന്‍റെ പൂട്ടുപൊളിച്ച് പോലീസ് അകത്തുകയറിയെങ്കിലും ഫലമുണ്ടായില്ല. യാക്കോബായ വിശ്വാസികളിൽ ചിലര്‍ പള്ളിയുടെ മുകളിൽ കയറി ആത്മഹത്യാഭീഷണി മുഴക്കിയതിനെത്തുടര്‍ന്നായിരുന്നു പോലീസിന്‍റെ പിന്മാറ്റം. അതേസമയം, സര്‍ക്കാരിന്‍റെ സമവായശ്രമങ്ങള്‍ക്ക് സഭ പിന്തുണ നല്‍കുമെന്ന് യാക്കോബായ സഭയുടെ കാതോലിക്കാ ബാവ ബസേലിയോസ് തോമസ് പ്രഥമൻ അറിയിച്ചിട്ടുണ്ട്.