പരവൂർ ദുരന്തം: ക്ഷേത്ര ഭാരവാഹികൾക്ക് ജാമ്യം നൽകില്ലെന്ന് കോടതി

കൊച്ചി: കൊല്ലം പരവൂർ വെടിക്കെട്ട് ദുരന്തവുമായി ബന്ധപ്പെട്ട കേസിൽ പുറ്റിങ്ങല്‍ ക്ഷേത്ര ഭാരവാഹികൾക്ക് ജാമ്യം അനുവദിക്കാനാകില്ലെന്ന് ഹൈക്കോടതി. ദുരന്തത്തിന്‍റെ പൂർണ ഉത്തരവാദിത്തം ക്ഷേത്ര ഭാരവാഹികൾക്കാണ്. ദുരന്തത്തിന്‍റെ ഉത്തരവാദിത്തം ജില്ലാഭാരവാഹികളുടേയും പൊലീസിന്‍റെയും തലയിൽ കെട്ടിവെയ്ക്കാനാകില്ലെന്നും കോട‌തി പറഞ്ഞു.

വെടിക്കെട്ടിന് അനുമതിയില്ലെന്ന കാര്യം ജില്ലാഭരണകൂടം പൊലീസിനെ അറിയിച്ചിട്ടില്ലെന്നാണ് ക്ഷേത്രം ഭാരവാഹികൾ അറിയിച്ചത്. വെടിക്കെട്ട് നടന്ന സ്ഥലത്ത് പൊലീസ് സാന്നിദ്ധ്യം ഉണ്ടായിരുന്നുവെന്നും ക്ഷേത്രം ഭാരവാഹികള്‍ വാദിച്ചു. എന്നാല്‍ ഈ വാദങ്ങൾ കോടതി തള്ളി.

കരാറുകാരന് ലൈസൻസ് ഉണ്ടായിരുന്നെന്നും മത്സരകമ്പം നടന്നില്ലെന്നും വാദിച്ചെങ്കിലും കോടതി ആ വാദം തള്ളുകയാണുണ്ടായത്.കേസിൽ വിശദമായ അന്വേഷണം വേണമെന്ന് പറഞ്ഞ കോടതി ഭാരവാഹികൾക്ക് ജാമ്യം അനുവദിക്കാനാകില്ലെന്നും വ്യക്തമാക്കി. ജാമ്യാപേക്ഷ കോടതി വെള്ളിയാഴ്ച വീണ്ടും പരിഗണിക്കും.