കേരള തീരത്ത് ശക്തമായ കടൽക്ഷോഭത്തിന് സാധ്യതയെന്ന് മുന്നറിയിപ്പ്

തിരുവനന്തപുരം: സംസ്ഥാനത്ത് ശക്തമായ കടൽക്ഷോഭം ഉണ്ടാകാൻ സാധ്യതയെന്ന് ദുരന്ത നിവാരണ അതോറിറ്റിയുടെ മുന്നറിയിപ്പ്. തിരുവനന്തപുരം, കൊല്ലം, ആലപ്പുഴ, കൊച്ചി, പൊന്നാനി, കോഴിക്കോട്, കണ്ണൂർ, കാസർഗോഡ് തീരപ്രദേശങ്ങളിൽ ശക്തമായ തിരമാലകൾ ഉയരാൻ സാധ്യതയുണ്ടെന്നും മുന്നറിയിപ്പുണ്ട്. കള്ളക്കടൽ പ്രതിഭാസത്തിന്റെയും സ്‌പ്രിങ്‌ ടൈഡിന്റെയും ഫലമാണിതെന്നാണ് മുന്നറിയിപ്പ്.

മൽസ്യബന്ധന തൊഴിലാളികളും തീരദേശവാസികളും മുന്നറിയിപ്പ് പരിഗണിച്ച് കടലിൽ പോകുന്നത് നിയന്ത്രിക്കണമെന്നും നിർദേശമുണ്ട്. വേലിയേറ്റ സമയത്ത് തിരമാലകൾക്ക് ശക്തി പ്രാപിക്കാൻ സാധ്യത കൂടുതലാണ്. നങ്കൂരമിടുമ്പോൾ ബോട്ടുകളും വള്ളങ്ങളും തമ്മിൽ കൂട്ടിയിടിക്കാതിരിക്കാൻ അകലം പാലിക്കണമെന്നും മുന്നറിയിപ്പിൽ വ്യക്തമാക്കുന്നു.