ഹൈന്ദവ സംഘടനകൾ ആയതു കൊണ്ടാണ് സംയമനം പാലിക്കുന്നത്: ശശികല

പത്തനംതിട്ട: ഹൈന്ദവ സംഘടനകൾ ആയതു കൊണ്ടാണ് ശബരിമല വിഷയത്തിൽ സംയമനത്തോടെയുള്ള പ്രതിഷേധം നടക്കുന്നതെന്ന് ഹിന്ദു എെക്യവേദി സംസ്ഥാന അധ്യക്ഷ കെ.പി.ശശികല. പോലീസ് നടപടി എന്തിന് വേണ്ടിയാണെന്ന് മനസ്സിലാവുന്നില്ല. ഭക്തരെ ഭയപ്പെടുത്താനാണ് പോലീസ് ശ്രമിക്കുന്നതെന്നും ശശികല പറഞ്ഞു.

നാമജപ പ്രതിഷേധം മാത്രമാണ് നടക്കുന്നത്. ഭക്തർ അവരുടെ വിഷമം തീർക്കുകയാണ് ചെയ്യുന്നത്. ഇത് അഭ്യർഥനരൂപത്തിലുള്ള സമരം മാത്രമാണ്. പിന്തിരിയാൻ വേണ്ടി തൃപ‍്‍തി ദേശായിയുടെ കാൽ പിടിക്കാൻ പോലും താൻ തയ്യാറായിരുന്നുവെന്നും ശശികല പറഞ്ഞു.

തിരിച്ച് പോവൂ എന്ന് പറഞ്ഞ് പ്രായമായ മാളികപ്പുറങ്ങൾ കാല് പിടിച്ച് അഭ്യർഥിക്കാൻ പോലും തയ്യാറായിരുന്നു. അയ്യപ്പഭക്തയല്ലാത്ത അവർ ശബരിമലയിൽ തൊഴാനായി വന്നതല്ല. അവർ ക്രെഡിറ്റ് എടുക്കാൻ വേണ്ടി മാത്രമാണ് വന്നതെന്നും ശശികല കൂട്ടിച്ചേർത്തു.

ശബരിമലയിൽ ദർശനം നടത്തിയ ശേഷം മാധ്യമപ്രവർത്തകരോട് സംസാരിക്കുകയായിരുന്നു ശശികല. കർശനമായ പോലീസ് നിർദ്ദേശങ്ങൾ അനുസരിച്ചാണ് ശശികല ദർശനം നടത്തിയത്.