പതിനെട്ടാംപടിയ്ക്ക് താഴെ പ്രതിഷേധവുമായി ഹിന്ദുമഹാസഭ

പത്തനംതിട്ട: തുലാമാസപൂജകള്‍ക്കായി ശബരിമല നട തുറക്കുന്ന സമയത്ത് ശബരിമല സന്നിധാനത്ത് പതിനെട്ടാംപടിയ്ക്ക് താഴെ ഹിന്ദുമഹാസഭയുടെ പ്രതിഷേധം. ഹിന്ദുമഹാസഭയുടെ പ്രവര്‍ത്തകര്‍ പതിനെട്ടാം പടിയ്ക്ക് താഴെ ബാനറുകളുമായി തടിച്ചു കൂടിയതായി മാതൃഭൂമി റിപ്പോര്‍ട്ട് ചെയ്തു.

നട തുറക്കുന്നതിന് മിനിട്ടുകള്‍ക്ക് മാത്രം മുൻപ് പോലീസ് നിലയ്ക്കലിൽ തടിച്ചു കൂടിയ അക്രമികള്‍ക്ക് നേര്‍ക്ക് ലാത്തി വീശിയിരുന്നു. മാധ്യമപ്രവര്‍ത്തകര്‍ക്കു നേര്‍ക്ക് വ്യാപകമായി ആക്രമണമുണ്ടാകുകയും പ്രതിഷേധക്കാര്‍ വാഹനങ്ങള്‍ തകര്‍ക്കുകയും ചെയ്തതോടെ സ്ഥിതിഗതികള്‍ നിയന്ത്രണാതീതമായിരുന്നു. നാല് മണിക്കൂറോളം നിലയ്ക്കലിൽ തീവ്രഭക്തര്‍ റോഡ് കയ്യേറിയതിനു പിന്നാലെയാണ് പോലീസ് നടപടിയുണ്ടായത്.

ആന്ധ്രാപ്രദേശിൽ നിന്ന് ശബരിമല ദര്‍ശനം നടത്താൻ മലകയറിത്തുടങ്ങിയ വിശ്വാസിയായ യുവതിയെ ഭീഷണിപ്പെടുത്തി പിന്തിരിപ്പിച്ചെന്ന കേസിൽ രാഹുൽ ഈശ്വറിനെ പോലീസ് കസ്റ്റഡിയിലെടുത്തിരുന്നു.