ആഭ്യന്തര വകുപ്പിനെതിരെ ജില്ലാ സമ്മേളനത്തിൽ വിമർശനം

കൊല്ലം: പൊലീസിന് ആഭ്യന്തരവകുപ്പ് നൽകിയിരിക്കുന്ന സ്വാതന്ത്ര്യം അപകടകരമാകുന്നുവെന്ന് കൊല്ലം ജില്ലാ സമ്മേളനത്തിൽ വിമർശനം. മുഖ്യമന്ത്രി പിണറായി വിജയൻ ഭരിക്കുന്ന ആഭ്യന്തര വകുപ്പിനെതിരെ സിപിഎം കൊല്ലം ജില്ലാ സമ്മേളനത്തിലാണ് രൂക്ഷ വിമർശനം ഉയർന്നത്. ന്യായമായ ആവശ്യങ്ങൾക്ക് പോലും പോലീസ് സ്റ്റേഷനിൽ ജനങ്ങൾക്ക് ചെല്ലാൻ കഴിയില്ലെന്ന് വിമർശനത്തിൽ പറയുന്നു. കൊല്ലം ജില്ലയിൽ പാർട്ടി വളരുന്നില്ലെന്നും റിപ്പോർട്ടിൽ പറയുന്നു.

മുഖ്യമന്ത്രിയെ ചർച്ചാവേദിയിൽ ഇരുത്തികൊണ്ട് തന്നെയായിരുന്നു വിമർശനം. ബിജെപിയെ നേരിടാൻ കോൺഗ്രസുമായി സിപിഎം കൈകോർക്കണമെന്ന സീതാറാം യച്ചൂരിയുടെ നിലപാടിനെ കൊല്ലം ജില്ലാ സമ്മേളനം പിന്തുണച്ചു. ചടയമംഗലം, കടക്കൽ ഏരിയ കമ്മിറ്റികളിൽ നിന്നുള്ളവരാണ് യെച്ചൂരിയുടെ അഭിപ്രായത്തോട് യോജിച്ചത്. പ്രവർത്തന റിപ്പോർട്ടിന്മേൽ ഇന്നും ചർച്ച തുടരും. പുതിയ ജില്ലാകമ്മിറ്റിയുടെ തെരഞ്ഞെടുപ്പ് നാളെയാണ് നടക്കുന്നത്.