ഹോട്ടല്‍ ഭക്ഷണത്തിന് വില കൂടും

കൊച്ചി: ഹോട്ടലുടമകള്‍ ഭക്ഷണത്തിന് വില കൂട്ടാനൊരുങ്ങുന്നു. നിത്യോപയോഗ സാധനങ്ങള്‍ക്കും പാചക വാതകത്തിനും വില കൂടുന്നതിനെ തുടർന്നാണിത്. കൂടാതെ ചെറുകിട-ഇടത്തരം ഹോട്ടലുകള്‍ക്ക് ജി.എസ്.ടി. ബാധകമാക്കിയതും ഹോട്ടലുടമകൾക്ക് തിരിച്ചടിയായിരിക്കുകയാണ്.

ഹോട്ടല്‍ ആവശ്യത്തിനുള്ള പാചകവാതക സിലിന്‍ഡറിന് രണ്ട് മാസം കൊണ്ട് 300 രൂപ കൂടി 1400 രൂപയായി. അരിവില 40 ന് മുകളിലും പഞ്ചസാര 45ഉം രൂപയായി.

വര്‍ഷം 20 മുതല്‍ 50 ലക്ഷം വരെ വിറ്റുവരവുള്ള ഹോട്ടലുകള്‍ പോലും അഞ്ച് ശതമാനം നികുതി നല്‍കണം. കൂടാതെ ശമ്പള വിതരണം ബാങ്ക് വഴി നല്‍കണം.

ഈ സാഹചര്യത്തില്‍ പിടിച്ച് നില്‍ക്കാന്‍ വിലകൂട്ടാതെ നിര്‍വാഹമില്ലെന്ന് കേരള ഹോട്ടല്‍ ആന്‍ഡ് റെസ്റ്റോറന്റ് അസോസിയേഷന്‍ ജന. സെക്രട്ടറി ജി. ജയപാല്‍ പറഞ്ഞു. ഓരോ കടക്കാരനും നിലനിന്നുപോകാനുള്ള നിലവാരത്തിലേക്ക് വില വര്‍ധിപ്പിക്കേണ്ടി വരും. എന്നാല്‍ ഇതുസംബന്ധിച്ച് അസോസിയേഷന്‍ തലത്തില്‍ തീരുമാനമെടുക്കില്ലെന്നും അദ്ദേഹം പറഞ്ഞു.

Hotel food to cost more.