ആലപ്പുഴയില്‍ ഹൗസ്‍ബോട്ടുകള്‍ കൂട്ടിയിടിച്ചു

ആലപ്പുഴ: മഹാരാഷ്ട്രയില്‍ നിന്നുള്ള 32 വിനോദ സഞ്ചാരികള്‍ യാത്ര ചെയ്‍തിരുന്ന ഹൗസ് ബോട്ട് മറ്റൊരു ഹൗസ് ബോട്ടുമായി കൂട്ടിയിടിച്ചു. ആലപ്പുഴ പള്ളത്തുരുത്തിയില്‍വച്ചാണ് അപകടം. ആര്യാട് സ്വദേശി മനോഹരന്‍ (63) ആണ് ഹൗസ് ബോട്ട് ഓടിച്ചിരുന്നത്. ഇയാള്‍ക്ക് ലൈസന്‍സ് ഇല്ലായിരുന്നു. മനോഹരനെ പോലീസ് അറസ്റ്റ് ചെയ്‍തു.

ഞായറാഴ്‍ച്ച രാവിലെ പള്ളത്തുരുത്തി പള്ളിയുടെ സമീപത്ത് വച്ചാണ് ബോട്ടുകള്‍ കൂട്ടിയിടിച്ചത്. കേരള പാലസ് എന്ന ഹൗസ് ബോട്ടില്‍ ആയിരുന്നു സഞ്ചാരികള്‍. യാത്ര തുടങ്ങാന്‍ ബോട്ട് ടെര്‍മിനലില്‍ നിന്ന് വള്ളം പിന്നോട്ട് എടുത്തപ്പോള്‍ നൊഹ ആര്‍ക് എന്ന മറ്റൊരു ഹൗസ് ബോട്ടില്‍ തട്ടി. ഈ ഹൗസ് ബോട്ടിലും സഞ്ചാരികള്‍ ഉണ്ടായിരുന്നു.

വള്ളം തട്ടിയതിന് ശേഷവും ഡ്രൈവര്‍ യാത്ര തുടര്‍ന്നതായി പോലീസ് പറയുന്നു. അധികം വൈകാതെ വള്ളത്തിനുള്ളിലേക്ക് വെള്ളം കയറാന്‍ തുടങ്ങി. തുടര്‍ന്ന് വള്ളം അടുപ്പിച്ചു. വിനോദ സഞ്ചാരികളെ പൂര്‍ണമായു ഒഴിപ്പിച്ചപ്പോഴേക്കും ബോട്ട് പകുതിയോളം മുങ്ങിയിരുന്നു - ടൈംസ് ഓഫ് ഇന്ത്യ റിപ്പോര്‍ട്ട് ചെയ്‍തു.