എന്താണീ ന്യൂനമർദ്ദം? എങ്ങനെയാണ് ചുഴലിക്കാറ്റ് ഉണ്ടാകുന്നത്?

അറബിക്കടലിൽ ലക്ഷദ്വീപിന് സമീപം രൂപപ്പെട്ട ന്യൂനമര്‍ദ്ദം ശനിയാഴ്ച രാത്രിയോ ഞായറാഴ്ച പുലര്‍ച്ചെയോ ഒരു ചുഴലിക്കാറ്റായി രൂപപ്പെടാമെന്നാണ് കാലാവസ്ഥാ റിപ്പോര്‍ട്ട്. അങ്ങനെയെങ്കിൽ ലൂബാൻ എന്ന പേരിൽ ഈ ചുഴലിക്കാറ്റ് ഒമാൻ തീരത്ത് ആഞ്ഞടിക്കുകയും കേരളത്തിൽ ഉള്‍പ്പെടെ കനത്ത മഴയ്ക്ക് കാരണമാകുകയും ചെയ്യും. എന്നാൽ എന്താണ് ഈ ന്യൂനമര്‍ദ്ദമെന്നും എങ്ങനെയാണ് ഇത് ചുഴലിക്കാറ്റായി മാറുന്നതെന്നും അറിയാമോ?


സ്വകാര്യ കാലാവസ്ഥാ നിരീക്ഷണ ഏജൻസി സ്കൈമെറ്റിൻ്റെ തലവൻ അറബിക്കടലിൽ രൂപപ്പെടുന്ന അടുത്ത ചുഴലിക്കാറ്റിനെപ്പറ്റി സംസാരിക്കുന്നു

ഭൂമിയിലെ ഏറ്റവും വിനാശകാരികളായ കാറ്റുകളാണ് ചുഴലിക്കാറ്റുകള്‍. സൈക്ലോൺ, ടൈഫൂൺ, ഹറികെയ്ൻ എന്നിങ്ങനെയെല്ലാം അറിയപ്പെടുന്നത് ചുഴലിക്കാറ്റ് എന്ന പ്രതിഭാസം തന്നെയാണ്. അറ്റ്ലാൻ്റിക് സമുദ്രത്തിലും കിഴക്കൻ പസഫിക് സമുദ്രത്തിലും രൂപപ്പെടുന്ന ചുഴലിക്കാറ്റുകളാണ് ഹറികെയ്നുകള്‍. പടിഞ്ഞാറൻ പസഫിക് സമുദ്രത്തിൽ ഉണ്ടാകുന്ന ചുഴലിക്കാറ്റുകളാണ് ടൈഫൂണുകള്‍. ഇന്ത്യൻ മഹാസമുദ്രത്തിൽ രൂപപ്പെടുന്ന ചുഴലിക്കാറ്റുകളെ സൈക്ലോണുകള്‍ എന്നാണ് വിളിക്കാറ്.

ചൂടും ഈര്‍പ്പവുമുള്ള വായുവാണ് ചുഴലിക്കാറ്റുകളുടെ ശക്തി. അതുകൊണ്ടാണ് ഇവ ഭൂമധ്യരേഖയ്ക്ക് സമീപമുള്ള താപനില കൂടിയ കടലിൽ രൂപപ്പെടുന്നത്.

സമുദ്രനിരപ്പിനോട് ചേര്‍ന്ന ഈര്‍പ്പമുള്ള വായു ചൂടു പിടിച്ച് ഉയരുന്നതോടെ ഇതിനു താഴെയുള്ള വായുവിന്‍റെ അളവ് കുറയുന്നു. അതായത്, ചൂടുള്ള വായു മുകളിലേയ്ക്ക് ഉയരുന്നതോടെ താഴെ കുറഞ്ഞ മര്‍ദ്ദമുള്ള ഒരു സ്ഥലം അഥവാ ന്യൂനമര്‍ദ്ദം രൂപപ്പെടുന്നു.

ഇതോടെ ചുറ്റുമുള്ള താരതമ്യേന മര്‍ദ്ദം കൂടിയ പ്രദേശങ്ങളിൽ നിന്നുള്ള വായു ഇവിടേയ്ക്ക് വന്ന് നിറയും. ഈ പുതിയ വായുവും കടലുമായുള്ള സമ്പര്‍ക്കത്തിൽ ഈര്‍പ്പം വര്‍ദ്ധിക്കുകയും ചൂടുകൂടി മുകളിലേയ്ക്ക് ഉയരുകയും ചെയ്യും. ഇങ്ങനെ ചൂടുകൂടി മുകളിലേയ്ക്ക് ഉയരുന്ന ഈര്‍പ്പമുള്ള വായു പിന്നീട് തണുത്ത് വലിയ മേഘങ്ങളായി മാറുന്നു. ന്യൂനമര്‍ദ്ദമേഖലയിലേയ്ക്ക് കാറ്റ് വീശുകയും മേഘങ്ങള്‍ മുകളിലേയ്ക്ക് ഉയരുകയും ചെയ്യുന്ന ഈ പ്രവൃത്തി ഇങ്ങനെ തുടര്‍ന്നു കൊണ്ടിരിക്കും. സാവധാനത്തിൽ ഇവിടം ഒരു ചുഴലിയുടെ രൂപത്തിലേയ്ക്ക് മാറുകയും ചെയ്യും.


ഭൂമധ്യരേഖയ്ക്ക് വടക്കുഭാഗത്ത് രൂപം കൊള്ളുന്ന ചുഴലിക്കാറ്റുകള്‍ ഇടതുവശത്തേയ്ക്കും തെക്കുഭാഗത്ത് രൂപം കൊള്ളുന്നവ വലതുഭാഗത്തേയ്ക്കുമായിരിക്കും കറങ്ങുക. ഭൂമിയുടെ അച്ചുതണ്ടിലുള്ള കറക്കം തന്നെയാണ് ഇതിന് കാരണം.

ഈ കാറ്റിന്‍റെ ശക്തി കൂടിക്കൂടി വരുന്നതോടെ ഇതിന്‍റെ മധ്യത്തിലായി ഒരു കണ്ണ് കൂടി രൂപപ്പെടുന്നു. ചുഴലിക്കാറ്റിന്‍റെ കണ്ണിൽ എപ്പോഴും കുറഞ്ഞ മര്‍ദ്ദമായിരിക്കും ഉണ്ടാകുക. ഇവിടം ശാന്തമായിരിക്കുകയും ചെയ്യും. മുകളിലുള്ള മര്‍ദ്ദം കൂടിയ വായു കണ്ണിനുള്ളിലേയ്ക്ക് ഒഴുകിക്കൊണ്ടിരിക്കും.

ഇങ്ങനെ വൃത്താകൃതിയിൽ കറങ്ങുന്ന കാറ്റിന്‍റെ വേഗം മണിക്കൂറിൽ 62 കിലോമീറ്ററാകുമ്പോള്‍ അതിനെ ഒരു ട്രോപ്പിക്കൽ സ്റ്റോം എന്ന് വിശേഷിപ്പിക്കാം. എന്നാൽ കാറ്റിന്‍റെ വേഗത 119 കിലോമീറ്ററാകുന്നതോടെ ഇത് ഒരു ചുഴലിക്കാറ്റായി മാറുന്നു.


കടലിൽ രൂപപ്പെടുന്ന ചുഴലിക്കാറ്റ് കരയിലേയ്ക്ക് പ്രവേശിക്കുന്നതോടെ ഇവയുടെ ശക്തി കുറയുന്നു. ചൂടുള്ള കടലിലെ വെള്ളത്തിൽ നിന്നുള്ള ഊര്‍ജ്ജം ഇല്ലാതാകുന്നതോടെ ചുഴലിക്കാറ്റ് ക്ഷയിക്കുന്നു. എങ്കിലും കരയിൽ കിലോമീറ്ററുകളോളം സഞ്ചരിച്ച് നാശം വിതയ്ക്കാൻ ചുഴലിക്കാറ്റിനാകും.

• 74 മുതൽ 79 മൈൽ വരെ വേഗതയുള്ള ചുഴലിക്കാറ്റുകളെ ശക്തി കുറഞ്ഞ ഒന്നാം വിഭാഗത്തിലാണ് ഉള്‍പ്പെടുത്തിയിരിക്കുന്നത്.
• 96 മുതൽ 110 മൈൽ വരെ വേഗതയുള്ളവയെ കാറ്റഗറി രണ്ടിലും 129 മൈൽ വരെ വേഗതയുള്ളവയെ കാറ്റഗറി മൂന്നിലും ഉള്‍പ്പെടുത്തിയിരിക്കുന്നു.
• 130 മുതൽ 156 മൈൽ വരെ വേഗതയുള്ള ചുഴലിക്കാറ്റുകളാണ് നാലാം വിഭാഗത്തിൽ ഉള്‍പ്പെടുന്നത്.
• അഞ്ചാം വിഭാഗത്തിൽപ്പെടുന്ന ചുഴലിക്കാറ്റുകളാണ് ഏറ്റവും വിനാശകാരികള്‍. 157 മൈലിന് മുകളിലാണ് ഇവയുടെ വേഗത.