ബ്ലോക്കിൽപെട്ട് മരണം: മനുഷ്യാവകാശ കമ്മീഷൻ സ്വമേധയാ കേസെടുത്തു

കോട്ടയം: ആശുപത്രിയിലേയ്ക്കുള്ള വഴിയിൽ ഗതാഗതക്കുരുക്കിൽപ്പെട്ട് ചികിത്സവൈകി പെണ്‍കുട്ടി മരിച്ച സംഭവത്തിൽ സംസ്ഥാന മനുഷ്യാവകാശ കമ്മീഷൻ സ്വമേധയാ കേസെടുത്തു. ജില്ലാ പോലീസ് മേധാവി സംഭവത്തെക്കുറിച്ച് അന്വേഷിച്ച് മൂന്നാഴ്ചയ്ക്കകം റിപ്പോര്‍ട്ട് നല്‍കണമെന്ന് കമ്മീഷൻ അംഗം കെ മോഹൻകുമാര്‍ ആവശ്യപ്പെട്ടു.

ഗുളിക തൊണ്ടയിൽ കുടുങ്ങിയതിനെതുടര്‍ന്നായിരുന്നു പരുത്തുംപാറ നടുവിലേപറമ്പിൽ റിൻ്റു - റീന ദമ്പനികളുടെ മകള്‍ ഐലിനെ ആശുപത്രിയിലെത്തിക്കാൻ ശ്രമിച്ചത്. മാതാവും ബന്ധുക്കളും അതുവഴിയെത്തിയ അബ്ദുള്‍ സലാമിന്‍റെ കാറിൽ ആശുപത്രിയിലെത്തിക്കാൻ ശ്രമിക്കുന്നതിനിടെയിലാണ് വാഹനം കോടിമത പാലത്തിലെ ഗതാഗതക്കുരുക്കിൽപെട്ടതും കുട്ടി ചികിത്സ കിട്ടാതെ മരിച്ചതും. മാധ്യമവാ‍ര്‍ത്തകളെ അടിസ്ഥാനമാക്കിയാണ് കമ്മീഷൻ സ്വമേധയാ കേസെടുത്തത്.