ബിഷപ്പിനെതിരെ തിങ്കളാഴ്‌ച മുതൽ നിരാഹാര സമരം

കൊച്ചി: ബിഷപ്പ് ഫ്രാങ്കോ മുളക്കലിനെതിരായ സമരം ശക്തമാക്കുന്നതിന്റെ ഭാഗമായി നിരാഹാര സമരം തുടങ്ങാൻ സമരസമിതി ധാരണ. നാളെ വൈകിട്ട് അഞ്ചു മണിക്ക് എല്ലാ ജില്ലാ കേന്ദ്രങ്ങളിലും പ്രതിഷേധ ധർണ സംഘടിപ്പിക്കാനും തീരുമാനമായി.നിരാഹാര സമരം തിങ്കളാഴ്‌ച മുതൽ എല്ലാ ജില്ലാ കേന്ദ്രങ്ങളിലും നടത്താനാണ് തീരുമാനം.

ബിഷപ്പിനെ അറസ്റ്റ് ചെയ്യണമെന്ന ആവശ്യത്തിൽ സമരസമിതിയും കന്യാസ്ത്രീകളും ഉറച്ചു നിൽക്കുകയാണ്. ബിഷപ്പിനെതിരായ അന്വേഷണം ശരിയായ ദിശയിൽ തന്നെയാണ് മുന്നോട്ട് പോകുന്നതെന്ന് ഹൈക്കോടതി നിരീക്ഷിച്ചു. സ്വതന്ത്രവും കാര്യക്ഷമവുമായ അന്വേഷണമാണ് ഇപ്പോൾ നടക്കുന്നത്. പോലീസ് അന്വേഷണത്തിന് എതിരെ നിരവധി ആരോപണങ്ങൾ ഉയർന്ന അവസരത്തിലാണ് ഹൈക്കോടതിയുടെ നിരീക്ഷണം. എന്നാൽ, ബിഷപ്പിനെ അറസ്റ്റ് ചെയ്യാത്തതിൽ പോലീസും സഭയും ബിഷപ്പും തമ്മിലുള്ള ഒത്തുകളിയാണോ എന്ന് സംശയമുണ്ടെന്ന് സമര സമിതി ആരോപിച്ചു.