തെരഞ്ഞെടുപ്പിൽ മത്സരിക്കുന്നില്ലെന്ന് ടിഎൻ പ്രതാപൻ

തിരുവനന്തപുരം: നിയമസഭാ തെരഞ്ഞെടുപ്പിൽ താൻ മത്സരിക്കുന്നില്ലെന്ന് കോൺഗ്രസ് നേതാവ് ടിഎൻ പ്രതാപൻ പാർട്ടി നേതൃത്വത്തെ അറിയിച്ചു. മൂന്ന് തവണ എംഎൽഎയായ തന്നെ ഇത്തവണ ഒഴിവാക്കണമെന്ന് കത്തിലൂടെയാണ് കെപിസിസിയുടെ തെരഞ്ഞെടുപ്പ് സമിതിയോട് പ്രതാപൻ ആവശ്യപ്പെട്ടിരിക്കുന്നത്. യുവാക്കൾക്കും പുതുമുഖങ്ങൾക്കും അവസരം നൽകണമെന്നും പ്രതാപൻ കത്തിൽ പറയുന്നു.

അതേസമയം പ്രതാപന്റെ കത്തിന്മേൽ കെപിസിസി തീരുമാനമെടുത്തിട്ടില്ല. കൊടുങ്ങല്ലൂർ മണ്ഡലത്തിലാണ് കഴിഞ്ഞ തവണ പ്രതാപൻ മത്സരിച്ചിരുന്നത്. ഇത്തവണയും കെപിസിസിയുടെ സാധ്യതാ പട്ടികയിൽ പ്രതാപന്‍റെ പേര് പരിഗണിക്കുന്നതായി സൂചനകളുണ്ട്.

അതേസമയം തെരഞ്ഞെടുപ്പിൽ മത്സരിക്കുന്നില്ലെന്ന പ്രതാപന്റെ നിലപാട് ധീരമെന്ന് കെപിസിസി പ്രസിഡന്റ് വി എം സുധീരന്‍ പ്രതികരിച്ചു.