മലയാളത്തിലെ 2 സംവിധായക‍ർക്ക് തീവ്രവാദി ബന്ധമെന്ന് ഇന്റലിജൻസ്

കൊച്ചി: മലയാളത്തിലെ പ്രശസ്തരായ രണ്ടു സംവിധായകരടക്കം 17 പേര്‍ക്കു തീവ്രവാദ പ്രസ്താനങ്ങളുമായി അനുഭാവമുണ്ടെന്നു കണ്ടെത്തിയതായി കേന്ദ്ര ഇന്റലിജന്‍സ് റിപ്പോര്‍ട്ട്. അസോസിയേറ്റ് മേക്കപ്പ്മാന്‍ മുതല്‍ സംവിധായകര്‍ വരെയുള്ളവരുടെ പട്ടികയാണ് കേന്ദ്ര രഹസ്യാന്വേഷണ വിഭാഗം കണ്ടെത്തി പുറത്തു വിട്ടിരിക്കുന്നത്. നിരന്തരം വിദേശ യാത്ര നടത്തുകയും, വിദേശത്തു നിന്നു ഫോണ്‍കോളുകയും വരുന്ന സംവിധായകരെയാണ് ഇപ്പോള്‍ ഇന്റലിജന്‍സ് വിഭാഗം സംശയിക്കുന്നത് എന്നാണ് ഓണ്‍ലൈന്‍ മാധ്യമങ്ങള്‍ റിപ്പോര്‍ട്ട് ചെയ്യുന്നത്. ഇവരുടെ സാമ്പത്തിക സ്രോതസുകള്‍ പരിശോധിച്ചതില്‍ നിന്നും ക്രമക്കേടുകള്‍ ഇന്റലിജന്‍സ് വിഭാഗത്തിനു കണ്ടെത്താന്‍ സാധിച്ചിട്ടുണ്ട്. തുടര്‍ അന്വേഷണത്തിനായി എന്‍ഐഎയ്ക്കും, സിബിഐയ്ക്കും ഇവരുടെ കേസ് ഫയല്‍ ഇന്റലിജന്‍സ് കൈമാറിയിട്ടുണ്ടെന്നാണ് പ്രാഥമികമായി ലഭിക്കുന്ന സൂചനകള്‍.

കഴിഞ്ഞ നാലു വര്‍ഷത്തിനിടെ അഞ്ചിലേറെ സിനിമകള്‍ സംവിധാനം ചെയ്ത നവാഗതരായ രണ്ടു സംവിധായകരെയാണ് ഇപ്പോള്‍ കേന്ദ്ര ഇന്റലിജന്‍സ് പ്രധാനമായും സംശയത്തിന്റെ നിഴലില്‍ നിര്‍ത്തിയിരിക്കുന്നത്. ഇവര്‍ സംവിധാനം ചെയ്ത ചിത്രങ്ങള്‍ക്കായി വിദേശത്തു നിന്നാണ് നിര്‍മാതാക്കള്‍ പണം മുടക്കിയിരിക്കുന്നത്.

ഈ രണ്ടു സംവിധായകരും ചുരുങ്ങിയ നാളുകള്‍ക്കിടയില്‍ തീവ്രവാദ ഭീഷണി നിലനില്‍ക്കുന്ന ആഫ്രിക്കന്‍ രാജ്യങ്ങളിലും, സൗദിയുടെ അതിര്‍ത്തി പ്രദേശങ്ങലിലും സന്ദര്‍ശനം നടത്തിയതായും രഹസ്യാന്വേഷണ വിഭാഗം കണ്ടെത്തിയിട്ടുണ്ട്. എന്നാല്‍, ഇവരുടെ തീവ്രവാദ ബന്ധം സ്ഥിരീകരിക്കത്തക്ക വിധത്തിലുള്ള വിവരങ്ങളൊന്നും ഇവരില്‍ നിന്നു കണ്ടെത്താന്‍ ഇന്റലിജന്‍സ് വിഭാഗത്തിനു സാധിച്ചിട്ടുമില്ല. ഈ സാഹചര്യത്തിലാണ് പുതിയ അന്വേഷണത്തിനായി കേസ് ഫയല്‍ ഇന്റലിജന്‍സ് വിഭാഗം എന്‍ഐഎയ്ക്കു കൈമാറിയിരിക്കുന്നതെന്നാണറിയുന്നത്.