ഇടുക്കി ഡാം: ഷട്ടർ അടക്കില്ല, ട്രയൽ റൺ തുടരും

ഇടുക്കി: ട്രയൽ റണ്ണിന്‍റെ ഭാഗമായി തുറന്ന ഇടുക്കി ചെറുതോണി ഡാമിന്‍റെ ഷട്ടർ അടക്കേണ്ടെന്ന് തീരുമാനം. നേരത്തെ നാല് മണിക്കൂർ ഷട്ടർ തുറന്നു വെക്കുമെന്നായിരുന്നു കെഎസ്ഇബി അറിയിപ്പ്. എന്നാൽ, നാളെ രാവിലെ ആറ് മണി വരെ ഷട്ടർ തുറന്നു വെക്കാൻ തീരുമാനിച്ചതായി കെഎസ്ഇബി അറിയിച്ചു. ഉച്ചക്ക് 12:30 ഓടെയാണ് ചെറുതോണി ഡാമിന്‍റെ മൂന്നാം നമ്പർ ഷട്ടർ തുറന്നത്.

ഷട്ടർ തുറന്ന ശേഷവും ഡാമിൽ ജലനിരപ്പ് ഉയർന്നു കൊണ്ടിരിക്കുന്ന സാഹചര്യത്തിലാണ് കെഎസ്ഇബിയും ദുരന്ത നിവാരണ സമിതിയും ഷട്ടർ അടക്കേണ്ട എന്ന തീരുമാനത്തിലെത്തിയത്. 50 സെന്‍റിമീറ്ററാണ് മൂന്നാം നമ്പർ ഷട്ടർ തുറന്നത്. സെക്കൻഡിൽ 50 ഘനമീറ്റർ ജലമാണ് ഇപ്പോൾ ഒഴുക്കി വിടുന്നത്. ചെറുതോണി,പെരിയാർ നദികളുടെ 100 മീറ്റർ പരിധിയിലുള്ളവർ സുരക്ഷിത സ്ഥാനങ്ങളിലേക്ക് മാറണമെന്ന് ഇടുക്കി ജില്ലാ കളക്ടർ അറിയിച്ചു. 26 വർഷങ്ങൾക്കു മുൻപ് 1992 ൽ ഇടുക്കി ഡാം തുറന്ന് അഞ്ച് ദിവസങ്ങൾക്ക് ശേഷമാണ് ഷട്ടർ അടച്ചത്.