ഇടുക്കി ഡാം ഉടൻ അടയ്ക്കില്ല; ഷട്ടറുകളിലൂടെയുള്ള ജലമൊഴുക്ക് കുറയ്ക്കും

ചെറുതോണി: കനത്ത മഴ നാശം വിതച്ച ഇടുക്കി ജില്ലയിൽ ദുരിതാശ്വാസപ്രവര്‍ത്തനങ്ങള്‍ വൈകില്ലെന്ന് ജില്ലാ കളക്ടര്‍. ഇടുക്കി ഡാമിലെ ജലനിരപ്പ് 2397 അടിയിലേയ്ക്ക് താഴ്ന്നാൽ ചെറുതോണി ഡാമിന്‍റെ ഷട്ടറുകള്‍ വഴി ഒഴുക്കുന്ന ജലത്തിന്‍റെ അളവ് കുറയ്ക്കാനും തിരുവനന്തപുരത്ത് ചീഫ് സെക്രട്ടറിയുടെ നേതൃത്വത്തിൽ ചേര്‍ന്ന യോഗത്തിൽ തീരുമാനമായി.

ജലനിരപ്പ് കുറഞ്ഞാലും ഷട്ടറുകള്‍ തത്കാലം അടയ്ക്കേണ്ടെന്നാണ് തീരുമാനം. ഡാമിന്‍റെ വൃഷ്ടിപ്രദേശത്ത് കനത്ത മഴയും നീരൊഴുക്കും തുടരുകയാണ്. വരുംദിവസങ്ങളിലും പ്രദേശത്ത് മഴ തുടരുമെന്നാണ് കാലാവസ്ഥാ നിരീക്ഷണകേന്ദ്രം അറിയിച്ചിട്ടുള്ളത്. നിലവിൽ 750 ഘന മീറ്റര്‍ ഘനമീറ്റര്‍ ജലമാണ് ഡാമിൽ നിന്ന് പുറത്തേയ്ക്ക് ഒഴുക്കുന്നത്. ഇത് 300 ആയി കുറയ്ക്കാനാണ് നീക്കം.

ജില്ലയിലെ ദുരിതാശ്വാസപ്രവര്‍ത്തനങ്ങള്‍ വിലയിരുത്താൻ ജില്ലാ കളക്ടറുടെ ആഭിമുഖ്യത്തിൽ ഇന്ന് ഇടുക്കി കളക്ടറേറ്റിൽ യോഗം ചേര്‍ന്നിരുന്നു. ഷട്ടറുകള്‍ വഴി ജലമൊഴുക്ക് കുറച്ചാലും വെള്ളത്തിൽ മുങ്ങിയ ചെറുതോണി പാലത്തിലൂടെയുള്ള ഗതാഗതനിരോധനം തുടരും. തുടര്‍ച്ചയായി ജലമൊഴുകിയതുമൂലം പാലത്തിന് ബലക്ഷയമുണ്ടായോ എന്ന് പരിശോധിച്ച ശേഷമായിരിക്കും പാലത്തിലൂടെയുള്ള ഗതാഗതം പുനസ്ഥാപിക്കുക.