ഇടുക്കി ഡാം ഇപ്പോള്‍ തുറന്നു വിടില്ലെന്ന് മന്ത്രി എംഎം മണി

ചെറുതോണി: നിലവിലെ സാഹചര്യത്തിൽ ഇടുക്കി ഡാം തുറന്നു വിടില്ലെന്ന് വൈദ്യുതി മന്ത്രി എംഎം മണി. പ്രദേശത്ത് മഴയും ഡാമിലേയ്ക്കുള്ള നീരൊഴുക്കും കുറഞ്ഞതായും ഡാം തുറന്നു വിടേണ്ട സാഹചര്യം ഇപ്പോഴില്ലെന്നും മന്ത്രി പറഞ്ഞതായി ഏഷ്യാനെറ്റ് ന്യൂസ് റിപ്പോര്‍ട്ട് ചെയ്തു.

ശനിയാഴ്ച വരെ അണക്കെട്ട് തുറക്കേണ്ട സാഹചര്യമില്ലെന്ന് മന്ത്രിസഭായോഗം വിലയിരുത്തിയിരുന്നു. ഇന്ന് രാവിലെ എട്ടുമണിയുടെ റീഡിങ് അനുസരിച്ച് 2396.12 അടിയാണ് ഡാമിലെ ജലനിരപ്പ്. 2403 അടി സംഭരണശേഷിയുള്ള ഡാമിന്‍റെ 91.83 ശതമാനം വെള്ളമാണ് ഇപ്പോള്‍ ഉള്ളത്.

ജലനിരപ്പ് 2397 അടിയിലെത്തുമ്പോള്‍ ട്രയൽ റൺ നടത്താനും 2399 അടിയിലെത്തുമ്പോള്‍ റഡ് അലര്‍ട്ട് പ്രഖ്യാപിക്കാനുമായിരുന്നു കെഎസ്ഇബി തീരുമാനിച്ചത്. മഴ കുറഞ്ഞ സാഹചര്യം പരിഗണിച്ച് 2400 അടിയിലെത്തിയ ശേഷം മാത്രം റെഡ് അലര്‍ട്ട് പ്രഖ്യാപിച്ചാൽ മതിയെന്നാണ് ഉദ്യോഗസ്ഥര്‍ക്ക് നല്‍കിയിരിക്കുന്ന നിര്‍ദേശം.

ജലനിരപ്പ് ഉയരുന്തോറും ഡാമിന്‍റെ വിസ്തൃതി കൂടുമെന്നതിനാൽ ഇനി സാവധാനം മാത്രമേ ജലനിരപ്പ് ഉയരാൻ സാധ്യതയുള്ളൂവെന്നാണ് ഡാം സുരക്ഷാവിഭാഗത്തിന്‍റെ കണക്കുകൂട്ടൽ.