ജലനിരപ്പ് താഴ്ന്നു; ഇടുക്കി ഡാം ഉടന്‍ തുറക്കില്ല

ഇടുക്കി: മഴ കുറഞ്ഞതോടെ ഇടുക്കി ഡാമില്‍ ജലനിരപ്പ് കുറഞ്ഞു. നിലവില്‍ ആശങ്കകള്‍ക്ക് സ്ഥാനമില്ലെന്ന് കെ എസ് ഇ ബി അറിയിച്ചു. മഴയും നീരൊഴുക്കും കുറഞ്ഞെങ്കിലും കെ എസ്‌ ഇ ബി പൂര്‍ണതോതില്‍ വൈദ്യുതോത്പാദനം നടത്തുന്നത് ജലനിരപ്പ് കൂടാതിരിക്കാന്‍ കാരണമായി. വരും ദിവസങ്ങളിലും ഇതേപോലെ തുടര്‍ന്നാല്‍ ട്രയല്‍ റണ്‍ ആവശ്യം വരില്ലെന്ന നിലപാടിലാണ് കെ എസ്‌ ഇ ബി.

ഇനിയും ഒരാഴ്ച കൂടി മഴ പെയ്താല്‍ മാത്രമേ ജലനിരപ്പില്‍ വര്‍ദ്ധനവ് ഉണ്ടാകുകയുള്ളൂ. 2396.30 അടിവെള്ളമാണ് ഇപ്പോള്‍ ഡാമിലുള്ളത്. 7.32 മില്ലിമീറ്റര്‍ മഴമാത്രമാണ് ഇന്നലെ ജില്ലയില്‍ മുഴുവന്‍ ലഭിച്ചത്.

ഇത്തവണത്തെ കാലവര്‍ഷത്തില്‍ ഇടുക്കി അണക്കെട്ടിന്‍റെ ജലനിരപ്പ് ക്രമാതീതമായി വര്‍ധിച്ചിരുന്നു. കനത്ത ജാഗ്രതാ നിര്‍ദേശമാണ് ഇതേ തുടര്‍ന്ന് നല്‍കിയിരുന്നത്. അണക്കെട്ടില്‍ റെഡ് അലേര്‍ട്ടും നല്‍കിയിരുന്നു.

ജലനിരപ്പ് ഉയര്‍ന്നതിനെ തുടര്‍ന്ന് മലമ്പുഴ ഡാമിന്‍റെ ഷട്ടറുകള്‍ ഭാഗികമായി ഉയര്‍ത്തിയിരുന്നു. ഇനി അത്തരം സാഹചര്യങ്ങള്‍ ഇടുക്കി അണക്കെട്ടില്‍ വേണ്ടിവരില്ലെന്നും അധികൃതര്‍ വ്യക്തമാക്കി.