ഇടുക്കി ഡാം പരിസരത്ത് സെല്‍ഫിക്കും ഫോട്ടോഗ്രഫിക്കും വിലക്ക്

ചെറുതോണി: ഇടുക്കി അണക്കെട്ടിലെ ജലനിരപ്പ് 2394 അടിയായി ഉയര്‍ന്നതിനെ തുടര്‍ന്ന് ഷട്ടറുകള്‍ തുറക്കുന്നതിനുള്ള മുന്‍കരുതല്‍ നടപടികള്‍ ആരംഭിച്ചു. ഡാം തുറന്നാല്‍ കര്‍ശന സുരക്ഷാ നടപടികള്‍ സ്വീകരിക്കണമെന്ന് നിര്‍ദേശം. ദുരന്ത നിവാരണ അതോറിറ്റി ഇടുക്കി ജില്ലാ ഭരണകൂടത്തിന് നിര്‍ദേശം നല്‍കി. നദിതീരങ്ങളിലോ പാലങ്ങളിലോ ആളുകള്‍ കൂടി നില്‍ക്കുന്നത് തടയണം. നദിയുടേയും നദീതീരത്തിന് 100 മീറ്റര്‍ പരിധിയില്‍ ആരെയും പോകാന്‍ അനുവദിക്കരുത്.



വെള്ളം പൊങ്ങുമ്പോൾ സെല്‍ഫിയും ഫോട്ടോയും എടുക്കാന്‍ അനുവദിക്കരുതെന്നും അതോറിറ്റി നിര്‍ദേശിച്ചു. ഇത്തരം ശ്രമങ്ങള്‍ നടത്തുന്നവര്‍ക്കെതിരെ നടപടിയെടുക്കാനും നിര്‍ദേശം നല്‍കി. കൂടാതെ ഡാം തുറക്കുമ്പോൾ വെളളം പൊങ്ങാനിടയുള്ള അഞ്ച് പഞ്ചായത്തുകളില്‍ വിനോദസഞ്ചാരത്തിനും വിലക്കേര്‍പ്പെടുത്തി. മരിയപുരം, വാഴത്തോപ്പ് കൊന്നത്തടി, കഞ്ഞിക്കുഴി, വാത്തുക്കുടി എന്നീ പഞ്ചായത്തുകളിലാണ് വിലക്ക് ഏര്‍പ്പെടുത്തിയത്.