നീരൊഴുക്ക് കുറഞ്ഞു; ഇടുക്കിയിൽ ജലനിരപ്പ് 2399.08 അടി

തൊടുപുഴ: സംസ്ഥാനത്ത് കനത്ത മഴയ്ക്ക് ശമനമായതോടെ ഇടുക്കി, ഇടമലയാര്‍ ഡാമുകളിലെ ജലനിരപ്പ് താഴുന്നു. രണ്ട് ഡാമുകളുടെയും വൃഷ്ടിപ്രദേശങ്ങളിൽ മഴ കുറഞ്ഞതിനെത്തുടര്‍ന്ന് ഡാമുകളിലേയ്ക്കുള്ള ജലനിരപ്പിൽ ഗണ്യമായ കുറവുണ്ടായിട്ടുണ്ട്. അതേസമയം, ചെറുതോണി അണക്കെട്ടിലെ അഞ്ചു ഷട്ടറുകള്‍ വഴിയും വെള്ളം പുറത്തേയ്ക്ക് ഒഴുക്കുന്നത് മൂന്നാം ദിവസവും തുടരുകയാണ്.

രാവിലെ 11 മണി വരെയുള്ള കണക്കുപ്രകാരം 2399.08 അടിയാണ് ഇടുക്കി ഡാമിലെ ജലനിരപ്പ്. കഴിഞ്ഞ 34 മണിക്കൂറിനകം ജലനിരപ്പ് രണ്ടടിയിലധികം താഴ്ന്നിട്ടുണ്ട്. അതേസമയം, പെരിയാറിലെ ജലനിരപ്പ് കുറഞ്ഞിട്ടുണ്ടെങ്കിലും എറണാകുളം ജില്ലയിൽ മാത്രം 12000ത്തോളം പേര്‍ ദുരിതാശ്വാസ ക്യാംപുകളിൽ കഴിയുന്നുണ്ട്.

വെള്ളിയാഴ്ച ഉച്ചയ്ക്ക് ചെറുതോണി ഡാമിന്‍റെ അഞ്ച് ഷട്ടറുകളും ഒരു മീറ്റര്‍ വീതം ഉയര്‍ത്തിയതുമുതൽ സെക്കൻഡിൽ ഏഴര ലക്ഷം ലിറ്റര്‍ വെള്ളമാണ് പുറത്തേയ്ക്ക് ഒഴുകുന്നത്. മണിക്കൂറിൽ 6.81,000 ലിറ്റര്‍ വെള്ളം അണക്കെട്ടിലേയ്ക്ക് ഒഴുകിയെത്തുന്നുണ്ട്.

ഇടമലയാര്‍ ഡാമിലെയും ജലനിരപ്പ് 168.90 മീറ്റര്‍ ആയി താഴ്ന്നിട്ടുണ്ട്. അണക്കെട്ടിന്‍റെ രണ്ട് ഷട്ടറുകള്‍ ഓരോ മീറ്റര്‍ വീതം ഉയര്‍ത്തിയിട്ടുണ്ട്. രണ്ട് ലക്ഷം ലിറ്റര്‍ വെള്ളമാണ് ഡാമിൽ നിന്ന് പുറത്തേയ്ക്ക് ഒഴുക്കുന്നത്. 169 മീറ്റര്‍ ആണ് ഡാമിന്‍റെ പരമാവധി സംഭരണശേഷി.

ചെറുതോണി ഡാമിൽ നിന്നുള്ള ഒഴുക്ക് വര്‍ധിച്ചതോടെ ചെറുതോണി പാലവും ബസ്സ്റ്റാൻഡും വെള്ളത്തിനടിയിലാണ്. ചെറുതോണി വഴി കട്ടപ്പനയ്ക്കുള്ള ഗതാഗതവും നിയന്ത്രിച്ചിട്ടുണ്ട്. വരുന്ന ദിവസങ്ങളിലും മഴയ്ക്ക് സാധ്യതയുള്ളതിനാൽ ഷട്ടര്‍ ഉടൻ അടയ്ക്കേണ്ടെന്നാണ് അധികൃതരുടെ തീരുമാനം. മഴയും നീരൊഴുക്കും പരിഗണിച്ചു മാത്രമേ ഷട്ടര്‍ അടയ്ക്കുന്ന കാര്യത്തിൽ തീരുമാനമുണ്ടാകൂ.