ഐഎഫ്എഫ്കെ ഡെലിഗേറ്റ് ഫീസ് ഈ വർഷം 2000 രൂപ

തിരുവനന്തപുരം: ഈ വര്‍ഷത്തെ കേരള അന്താരാഷ്ട്ര ചലച്ചിത്ര മേളയുടെ ഡെലിഗേറ്റ് ഫീസ് 2000 രൂപയായിരിക്കുമെന്ന് സാംസ്കാരിക വകുപ്പ് മന്ത്രി എ കെ ബാലൻ. പ്രളയക്കെടുതി കണക്കിലെടുത്ത് ചെലവ് ചുരുക്കിയായിരിക്കും മേള സംഘടിപ്പിക്കുക. 10 ലക്ഷം രൂപയുടെ സമഗ്ര സംഭാവനയ്ക്കുള്ള പുരസ്കാരം ഇത്തവണ ഉണ്ടാവില്ലെന്നും മന്ത്രി അറിയിച്ചു.

പ്രളയത്തിന്‍റെ പശ്ചാത്തലത്തിൽ മേള ഉപേക്ഷിക്കാനായിരുന്നു ആദ്യ തീരുമാനമെങ്കിലും ആര്‍ഭാടങ്ങള്‍ ഒഴിവാക്കി മേള നടത്താൻ പിന്നീട് തീരുമാനിക്കുകയായിരുന്നു.

ചലച്ചിത്ര അക്കാദമി സ്വന്തം നിലയ്ക്കാണ് ഇത്തവണ മേള സംഘടിപ്പിക്കുന്നത്. ചെലവ് ചുരുക്കുന്നതിന്‍റെ ഭാഗമായി വിദേശ അതിഥികളുടെ എണ്ണം കുറയ്ക്കാനും കൂടാതെ ഏഷ്യൻ സിനിമകള്‍ക്കും ജൂറികള്‍ക്കും കൂടുതൽ പ്രാധാന്യം നല്‍കാനും തീരുമാനമായിട്ടുണ്ട്.

ഉദ്ഘാടന - സമാപന ചടങ്ങുകളിലെ ആഘോഷങ്ങള്‍ ഇത്തവണ ഉണ്ടാകില്ല.